Antıkor Atyraýda 43 mln teńge bıýdjet qarajatyn jymqyrýǵa jol bermedi

ATYRAÝ. QazAqparat - Atyraý oblysynyń sybaılas jemqorlyqqa qarsy kúres departamenti Inder aýdanynda ınjenerlik-kommýnıkatsııalyq ınfraqurylym (sýmen jabdyqtaý) salý kezinde oryndalǵan jumystyń jalǵan aktilerine qol qoıý arqyly bıýdjet qarajatyn jymqyrý táýekelin anyqtady.

Inder aýdanynyń qurylys bólimi men «Baısyn-A» JShS arasynda Inder aýdanynyń Aqqala aýylyndaǵy «oń jaǵalaý» bóliginiń ýchaskesine jalpy somasy 1 mlrd teńgeden astam ınjenerlik-kommýnıkatsııalyq ınfraqurylym salýǵa shart jasalǵan.

Tapsyrys berýshi qazan jáne maýsym aılarynda oryndalǵan jumys aktilerine qol qoıdy, sondaı-aq aqy tólendi, alaıda is júzinde jumys oryndalmady.

Atap aıtqanda betonnan jasalǵan aıaldamalar, polıetılen qubyrdan jasalǵan qubyrlar, qıyrshyq tas negizi jáne basqa da qurylǵylar ornatylmady.

Zalaldyń somasy 43 mln teńgeden asty.

Anyqtalǵan zańbuzýshylyqty Atyraý oblysynyń memlekettik sáýlet-qurylys baqylaý basqarmasy jáne Atyraý oblysy boıynsha ishki memlekettik aýdıt departamenti mamanynyń qorytyndysy rastady.

Qazirgi ýaqytta Atyraý oblysy ákimdiginiń jaýabyna sáıkes kemshilikter joıylǵan, obekt kórsetilgen merzimde ýaqtyly tapsyrylady.

Aqparatty rastaý, osy máseleni talqylaý jáne sybaılas jemqorlyq quqyq buzýdyń aldyn alý maqsatynda Atyraý oblysy boıynsha sybaılas jemqorlyqqa qarsy qyzmettiń basshysy Erlan Dosanov Inder aýdany Aqqala aýylyndaǵy sýmen jabdyqtaý obektisine bardy.

«Departamenttiń aralasýynan keıin anyqtalǵan zańbuzýshylyqtar tolyǵymen joıylǵan, kináli adamdar jazalanǵan. Erte anyqtalǵan kemshilik bıýdjet qarajatyn urlaýǵa jol bermeýge jáne sapasyz qurylystyń aldyn alýǵa múmkindik berdi, sondaı-aq halyqty ýaqtyly taza aýyz sýmen qamtamasyz etýge múmkindik berdi», - dep atap ótti oblystyq antıkor basshysy Erlan Dosanov.