Antıkor Almaty oblysynyń sport basqarmasyn tekserip jatyr
QONAEV. KAZINFORM - Almaty oblysy boıynsha Sybaılas jemqorlyqqa qarsy qyzmet jemqorlyqtyń sebepteri men jaǵdaılaryn anyqtaý úshin óńirdegi sport salasyn tekseredi.
Vedomstvo málimetinshe, aldymen eń kóp qarjy bólingen sport salasyndaǵy jemqorlyq táýekelderine syrtqy taldaý júrgiziledi. Tekserý nysanyna oblystyq Dene shynyqtyrý jáne sport basqarmasy, ári oǵan qaraıtyn uıymdar ilinip otyr.
«Budan bólek, sporttyq is-sharalardy, jıyndardy, jabdyqtardy, sporttyq tamaqtanýdy satyp alýdy, oqý-jattyǵý jıyndaryn uıymdastyrýdy qamtamasyz etetin bıýdjettik jáne bıýdjetten tys kózder zerdelenetin bolady. Taldaý departamenttiń, múddeli memlekettik organdardyń qyzmetkerlerimen jáne azamattyq qoǵam ókilderimen júrgiziledi», – dep habarlady Sybaılas jemqorlyqqa qarsy qyzmetinen.
Sonymen qatar, Antıkor ókilderi azamattardy Sybaılas jemqorlyqty anyqtaýǵa qatysýǵa shaqyrdy.
«Eger Sizde jemqorlyq táýekelderi týraly aqparat bolsa nemese sportty qarjylandyrý salasyn jetildirý boıynsha usynystaryńyz bolsa, olardy almobl.prevent@antikor.gov.kz elektrondyq poshtasyna jiberýińizdi suraımyz», – delingen habarlamada.
