Antıfrod júıeleri arqyly 77 mıllıonnan astam alaıaqtyq qońyraý buǵattaldy
ASTANA. KAZINFORM – Qazaqstanda ınternet jáne qarjylyq alaıaqtyqqa qarsy kúres kúsheıtildi. Antıfrod júıeleriniń kómegimen 77 mıllıonnan astam alaıaqtyq qońyraý buǵattalǵan. Bul týraly Jasandy ıntellekt jáne tsıfrlyq damý mınıstrligi málimdedi.
Vedomstvonyń habarlaýynsha, atalǵan jumys tehnologııalyq sheshimderge, vedomstvoaralyq úılestirýge jáne jedel áreket etý tetikterine negizdelgen.
Ulttyq quryltaıdyń besinshi otyrysynda Memleket basshysy Qasym-Jomart Toqaev ınternet jáne qarjylyq alaıaqtyqtyń artýyna, sondaı-aq onyń azamattardyń ál-aýqatyna tıgizip otyrǵan keri áserine nazar aýdarǵan bolatyn. Prezıdenttiń aıtýynsha, azamattar alaıaqtyq shemalarmen jıi betpe-bet kelip, jeke qarajattarynan aıyrylyp jatyr, bul memleket tarapynan aldyn alý jáne qorǵaý sharalaryn júıeli túrde kúsheıtýdi talap etedi.
Osy tapsyrmalardy iske asyrý aıasynda Almaty qalasynda Ulttyq bank pen baılanys operatorlarynyń antıfrod-ortalyqtarynyń jumysyn kórsetýge arnalǵan praktıkalyq demonstratsııa ótti. Іs-sharaǵa memlekettik organdardyń, qarjy sektorynyń jáne telekommýnıkatsııa salasynyń ókilderi qatysty.
Kezdesý barysynda alaıaqtyq qońyraýlardy, nómirdi aýystyrý áreketterin, jalǵan SMS-habarlamalardy jáne kúmándi trafıkti naqty ýaqyt rejıminde anyqtaý jáne buǵattaý tetikteri kórsetildi. Sonymen qatar bankter, baılanys operatorlary men quqyq qorǵaý organdary arasyndaǵy ózara is-qımyldyń qalaı uıymdastyrylǵany tanystyryldy.
Mınıstrlik málimetinshe, qazirgi antıfrod júıeler minez-qulyqtaǵy aýytqýlardy jáne baılanys arnalaryndaǵy tehnıkalyq parametrlerdi taldaý arqyly alaıaqtyq áreketterdi erte kezeńde – azamattar shemaǵa tartylyp úlgermeı nemese qarjylyq operatsııany rastaǵanǵa deıin – anyqtap, toqtatýǵa múmkindik beredi.
Demonstratsııa barysynda baılanys operatorlary antıfrod bólimsheleriniń jumysy qorytyndylandy. Usynylǵan derekterge sáıkes, búgingi kúnge deıin 77 mıllıonnan astam alaıaqtyq qońyraý buǵattalǵan.
Vedomstvo ókilderi bul model alaıaqtyqpen kúreste «zalal keltirilgennen keıin áreket etý» tásilinen ınfraqurylym deńgeıinde aldyn alý formatyna kóshýdi bildiretinin atap ótti. Antıfrod-ortalyqtar men Ulttyq Banktiń tehnologııalyq ózara yqpaldastyǵy azamattardy qorǵaý tıimdiligin arttyryp, táýekelderdi aıtarlyqtaı tómendetýge múmkindik berip otyr.
Aıta keteıik, Almatyda alaıaqtarǵa aldanǵan turǵyndarǵa 700 mln teńgege jýyq qarjy qaıtaryldy.