Antıdopıngtik agenttik tyıym salynǵan tizimnen alkogoldi syzyp tastady
ASTANA. QazAqparat - Búkilálemdik antıdopıngtik agenttik (BAA) 2018 jyldyń 1 qańtarynan bastap sportshylardyń qanynan alkogoldi teksermeıtin bolady. Atletterge sonymen birge sıntetıkalyq kannabıdıoldy tutynýǵa ruqsat berildi, dep habarlaıdy «QazAqparat» Qazaqstan boks federatsııasynyń baspasóz qyzmetine silteme jasap.
Boks federatsııasynyń ǵylymı-keshendik tobynyń úılestirýshisi Ǵalııa Bilálova Shymkentte oblys jattyqtyrýshylarymen ótken semınarda 2018 jyly «tyıym salynǵan tizim » týraly jańalyqtarmen bólisken.
«Ózgerister týraly bizge birden Qzaaqstannyń ulttyq antıdopıngtik ortalyǵy habardar etti. Bizdiń tapsyrmamyz - osy aqparatty óńirlerge taratý. Alkogolge keler bolsaq, avtosport, aeronavtıka, sadaqpen atý, qaıyq boıynsha sý sporty qatarly birneshe halyqaralyq federatsııalarǵa bul ruqsatty júzege asyrý kerek pe, joq pa degen usynys bildirildi», - deıdi Ǵalııa Bilálova.
Búkilálemdik antıdopıngtik agenttik sportshylardyń amandyǵy eń birinshi baǵyt ekenin eske salǵan. BAA óz quzyryndaǵy «alkogoldik» zertteýler úshin jumsalatyn shyǵyndy budan bylaı shyǵarmaıtyn bolǵan kórinedi. Sportshylardyń saýlyǵyn oılaıtyn federatsııalar bul baǵyttaǵy jumsalatyn shyǵyndy ózderi óteıtin bolady.
«Ósetin kannabıdıol, ózge de kannabıdıoldar sekildi qatań tyıymda bolsa da, bul zattyń qoldan jasalǵan túrin tutynýǵa ruqsat etilgen. Onyń quramynda psıhologııaǵa áser etetin belsendi zat joq jáne ol birqatar aýrýlarǵa qarsy qoldanylady. Birneshe memleketterde bul zattyń mártebesi naqtylanbasa da, BAA sıntetıkalq kannabıdıoldy zańdastyryp otyr», - deıdi ol.
Sonymen birge, V12 dárýmenin tutynýǵa ruqsat etilgen. Keıbir mýltıdárýmenderdegi kobalt pen onyń tuzdaryna tyıym saqtalǵan. Tyıym salynǵan tizimnen glıtserın syzylǵan, sebebi ol qan plazmasynyń kólemine áser etpeıdi. 2016 jyly shýly zatqa aınalǵan meldonııaǵa da tyıym saqtalyp otyr.
«Bizdiń «tirkelgen pýlda», ıaǵnı WADA quramynda birqatar boksshylar, Olımpıada oıyndarynyń jáne álem chempıonattarynyń jeńimpazdary, jattyqtyrýshylary men dárigerleri enedi. Olar kún saıyn 15 mınýt dáldikpen qandaı mekenjaıda bolatyny týraly habarlaýy kerek. Sebebi kez-kelgen kún men saǵatta eskertýsiz, olarǵa WADA ofıtseri kelýi múmkin. Biraq jalpy alǵanda biz «tosynsyılardan» qoryqpaımyz, óıtkeni turaqty túrde dopıngke qarsy jumys júrgizilýde», - deıdi Ǵalııa Bilálova.
