Antıbıotıkti dárigerdiń nusqaýynsyz paıdalanbaý kerek - L. Makalkına
ASTANA. QazAqparat - Antıbıotıkterdi shamadan tys paıdalanýdy tejeý kerek. QR Densaýlyq saqtaý jáne áleýmettik damý mınıstrliginiń «Densaýlyq saqtaýdy damytý respýblıkalyq ortalyǵynyń» dárilik aqparattyq-taldaý ortalyǵynyń jetekshisi Larısa Makalkına málim etti.
«Antıbıotıkterdi shamadan tys qoldaný halyqtyń densaýlyǵyna keri áserin tıigizetin jáıtter az emes. Osy oraıda antıbıotıkterge turaqtylyqty tejeý boıynsha nátıjeli sharalardy ázirleý qajettiligi týyndap otyr», - deıdi L. Makalkına. Onyń sózine qaraǵanda, jospar boıynsha bul baǵytta birqatar sharalardy iske asyrý qolǵa alynǵan. Osy turǵyda mıkro-bıologııalyq monıtorıngti kúsheıtý, antıbıotıkterdi paıdalanýdyń tıimdi erejelerin ázirleý, sonymen qatar dárilik zattardy tıimdi paıdalaný aıasynda halyqtyń bilimin jetildirý qamtylyp otyr. «Jalpy antıbıotıkterdi dárigerdiń nusqaýynsyz paıdalanbaý kerek degen ustanymdamyz. Biz búginde jastardy dárilerdi durys paıdalaný baǵytyndaǵy saýatyn arttyrýdy maqsat etip qoıdyq»,-dedi L. Makalkına. Aıta keteıik, Dúnıejúzilik densaýlyq saqtaý uıymynyń jańa baıandamasynda antıbıotıkterdi kóp paıdalaný barsha adamzatqa qater týdyryp otyrǵandyǵy jaıynda habarlanǵan. Bul dárilik zattar shamadan tys qoljetimdi bolyp otyr jáne dárigerdiń taǵaıyndaýynsyz erkin saýdaǵa shyǵarylǵan. Dárilik aqparattyq-taldaý ortalyǵynyń júrgizgen saýalnamasyna qaraǵanda, 2014 jyly árbir tórtinshi adam (27,5 paıyz) antıbıotıkti dárigerdiń taǵaıyndaýynsyz qabyldaıdy eken. Respondentterdiń tek 67,9 paıyzy dáriniń bul túrin dárigerdiń aıtýymen alady.
