Antıbıotıkterdi paıdalaný jaǵynan astanalyqtar alda keledi
ASTANA. QazAqparat - Antıbıotıkterdi kóp paıdalaný jaǵynan astanalyqtar kósh bastap tur. Bul týraly búgin Astanada ótken dóńgelek ústelde QR Densaýlyq saqtaý jáne áleýmettik damý mınıstrliginiń «Densaýlyq saqtaýdy damytý respýblıkalyq ortalyǵynyń» dárilik aqparattyq-taldaý ortalyǵynyń jetekshisi Larısa Makalkına málim etti.
Qazaqstannyń dárigerleri atalǵan dárilerdi shamadan tys paıdalaný qaterli ekenin eskertti. Dári-dármek aqparatty-taldaý ortalyǵy sońǵy tórt jylda Qazaqstanda dárilik zattardy taǵaıyndaýdyń tájirıbesine zertteý júrgizip keledi. Zertteýdiń alǵashqy jylynda (2011 jyly) antıbıotıkti paıdalaný kórsetkishi joǵary bolǵan. Sodan beri onyń deńgeıi 16 paıyzǵa tómendegen. «Biz zertteýdi birinshi ret júrgizgen kezde Astanada taǵaıyndalǵan dárilerdiń 50 paıyzy antıbıotık bolatyn. Nege? Sebebi, Astana - ol sheneýnikter qalasy. Osy oraıda qyzmetkerler jumystan qalmaý úshin antıbıotıkterdi paılanady. Osynyń sebebinen antıbıotıkterdi paıdalaný deńgeıi elordada joǵary. Bıyl bul kórsetkish 18 paıyzǵa deıin tómendegenin baıqadyq. Jalpy aıtqanda, Astana dáriniń bul túrin paıdalaný kórsetkishin aıtarlyqtaı azaıtty»,-dedi sarapshy. Larısa Makalkına antıbıotıkterdi dárigerdiń nusqaýynsyz paıdalanbaý kerek degen usynysyn aıta kele, bul baǵytta adamdardy dárilerdi durys paıdalaný úshin saýatyn arttyrý qajettigin jetkizdi.
