Antıbıotıkti orynsyz qoldanýdan adam aǵzasy álsireıdi - dáriger
ALMATY. KAZINFORM – Almaty qalasynyń sanıtarııalyq-epıdemıologııalyq baqylaý departamenti basshysynyń orynbasary Ásel Qalyqova antıbıotıkterdi orynsyz qoldanýǵa bolmaıtynyn aıtty.
Onyń sózinshe, antıbıotıkter - HH ǵasyr medıtsınasyndaǵy eń uly jetistikterdiń biri. Olardyń arqasynda adamzat buryn jappaı ólimge ákelgen kóptegen juqpaly aýrýlardy jeńe aldy. Alaıda antıbıotıkterdi uzaq jyldar boıy keńinen jáne baqylaýsyz paıdalaný jańa qaýiptiń týyndaýyna sebep bolǵan.
- Antıbıotıkterge tózimdilik - bakterııalardyń buryn olardy tıimdi joıǵan antıbıotıkterdiń áserine qaramastan ómir súrip, kóbeıe alý qabileti, ıaǵnı beıimdelýi. Bul qubylys tabıǵı evolıýtsııalyq protsess nátıjesinde paıda bolady. Biraq onyń taralýy antıbıotıkterdi shamadan tys qoldanýynan jyldamyraq júredi, - dedi ol.
Maman Dúnıejúzilik densaýlyq saqtaý uıymynyń boljamyna sáıkes, 2050 jylǵa qaraı antıbıotıkterge tózimdi ınfektsııalar jyl saıyn mıllıondaǵan adamnyń ólimine ákelýi múmkin ekenin atap ótti.
Onyń aıtýynsha, antıbıotıkterge tózimdiliktiń taralý sebepteri:
- antıbıotıkterdi durys qoldanbaý - dárigerdiń taǵaıyndaýynsyz qabyldaý, burynǵy dárilerdiń qaldyǵyn paıdalaný, emdeý kýrsyn aıaqtamaý;
- antıbıotıkterdi vırýs týdyratyn aýrýlarǵa qoldaný, mundaı jaǵdaıda olar tıimdi emes;
- mal sharýashylyǵynda antıbıotıkterdi janýarlardyń ósýin tezdetý maqsatynda paıdalaný.
Ásel Qalyqova bul aıtylǵan jaǵdaılardyń aldyn alyp, antıbıotıkterdi orynsyz qabyldamaý qajet ekenin eskertti.
Eske salaıyq, Germanııada antıbıotıkterdi durys qoldanbaǵandyqtan ondaǵan myń adam kóz jumdy.