Antıbıotıkti orynsyz qoldaný nesimen qaýipti
ASTANA. KAZINFORM – Antıbıotıkterdi negizsiz jáne shamadan tys qoldaný, olardy retseptsiz qabyldaý jáne emdeý tártibin saqtamaý dárige tózimdiliktiń kúsheıýine áser etedi.
Bul jóninde resmı saýalymyzǵa joldaǵan jaýabynda QR Densaýlyq saqtaý mınıstrliginiń Sanıtarııalyq-epıdemıologııalyq baqylaý komıteti málimdedi.
Komıtet málimetinshe, 2019–2023 jyldary júıelik antıbıotıkterdi tutyný kólemi ósken.
– Dúnıejúzilik densaýlyq saqtaý uıymynyń AWaRe jiktemesi boıynsha WATCH tobynyń úlesi joǵary bolyp otyr. Bul antıbıotıkterdi utymdy paıdalanýdy odan ári kúsheıtýdi qajet etedi, – delingen resmı jaýapta.
Antıbıotıkke tózimdilikke keń spektrli preparattardy artyq paıdalaný da áser etedi.
Aıta keteıik, retseptimen beriletin antıbıotıkterdi dárigerdiń taǵaıyndaýynsyz satýǵa zańmen tyıym salynǵan. Sońǵy jyldary dárihanalarǵa baqylaý kúsheıtilip, zań buzylǵan jaǵdaıda ákimshilik sharalar qoldanylyp keledi.
Balalarǵa antıbıotık taǵaıyndaýǵa da erekshe mán beriledi. Osy baǵytta pedıatrlardyń biliktiligin arttyrý jáne dárini tek qajet bolǵan jaǵdaıda taǵaıyndaý jumystary júrgizilip jatyr.
Medıtsınalyq uıymdarda antıbıotık taǵaıyndaýdyń negizdiligi klınıkalyq hattamalar, mıkrobıologııalyq zertteýler, klınıkalyq farmakologterdiń jumysy, ishki aýdıt jáne antımıkrobtyq terapııany baqylaý baǵdarlamalary arqyly qadaǵalanady.
– Qazir antıbıotıkterge tózimdilikti tejeýge arnalǵan jol kartasy iske asyrylyp jatyr. Onyń aıasynda zerthanalyq dıagnostıkany kúsheıtý, antıbıotıkterdi utymdy paıdalaný, retseptisiz satýǵa baqylaýdy arttyrý, medıtsınalyq uıymdarda antımıkrobtyq terapııany basqarý jáne «Biryńǵaı densaýlyq» tásilin damytý kózdelgen, – dep habarlady Sanıtarııalyq-epıdemıologııalyq baqylaý komıteti.
Eske salaıyq, buǵan deıin Almaty qalasynyń sanıtarııalyq-epıdemıologııalyq baqylaý departamenti basshysynyń orynbasary Ásel Qalyqova antıbıotıkterdi orynsyz qoldanýǵa bolmaıtynyn aıtqan edi.
