Antı Call-ortalyqtar 70 myńnan astam alaıaqtyq qońyraýdy toqtatty
ASTANA. KAZINFORM — Bas prokýror Berik Asylov ınternet-alaıaqtarǵa qarsy Antı Call-ortalyqtardyń nátıjesin jarııalady.
Bas prokýror ınternet-alaıaqtarǵa qarsy is-qımyl jáne azamattarymyzdy qorǵaý jóninde júıeli jumystar jalǵasyp jatqanyn aıtty. Onyń sózinshe, bıyl prokýratýra organdary «Qazaqtelekom» AQ-men birlesip, Astanada alaıaqtardyń qońyraýlaryn toqtatýǵa jáne qylmystar jasalǵanǵa deıin olardyń aldyn alýǵa baǵyttalǵan Antı Call-ortalyǵy biregeı jobasyn iske qosty. Jumys bastalǵan sátten bastap, úsh aıdan sál astam ýaqyt ishinde yqtımal qurbandarǵa 70 myńnan astam sheteldik qońyraýlar toqtatyldy.
— Ortalyq bilikti operatorlarmen jasaqtalǵan jáne prokýrorlardyń táýlik boıy úılestirýimen jumys istep jatyr. Nátıjesinde Astanada aǵymdaǵy jyldyń 10 aıynyń qorytyndysy boıynsha ınternet-alaıaqtyqtyń 22%-ǵa turaqty tómendeýi baıqalyp otyr. Basqasha aıtqanda, myńdaǵan azamattar qarjylyq shyǵyndar men aldaýdan qorǵalǵan, — dep jazdy Berik Asylov H paraqshasynda.
Sondaı-aq vedomstvo basshy ortalyq barlyq qazaqstandyqtarǵa qatysty qylmystyq alaıaqtyq áreket júrgizetin sheteldik koll-ortalyqtary men tsıfrlyq qurylǵylardyń ornalasqan jerin anyqtaýǵa kómektesip kele jatqanyn alǵa tartty.
— Reseıdiń, Ýkraınanyń jáne Armenııanyń quqyq qorǵaý organdarymen birlesip telefondyq alaıaqtyqpen aınalysqan on qylmystyq keńse áshkerelenip, olardyń qyzmeti toqtatyldy. Olar 63 qaskúnemdi ustady, beıneni jáne daýysty aýystyrýǵa arnalǵan baǵdarlamalyq qamtamasyz etý (dıpfeık tehnologııasy) jáne Qazaqstan azamattarynyń derbes derekter bazasy bar júzdegen arnaıy tehnıka tárkilendi, — dedi Asylov.
Berik Asylov atap ótkendeı, bul qylmystardyń shegi joq, sondyqtan olarǵa qarsy kúreste halyqaralyq ózara is-qımyl atalǵan baǵytta negizgi quralǵa aınalyp otyr. Máselen, Belarýs Respýblıkasynyń quqyq qorǵaý organdarymen tyǵyz ózara is-qımyl jolǵa qoıylyp, olarmen birlesken jedel-tergeý toby quryldy jáne qazirgi ýaqytta Belarýste basqa elderdiń, onyń ishinde Qazaqstannyń azamattaryna qatysty qarsy jumys istegen 55 adam jaýapqa tartyldy. Olardyń azamattarymyzǵa keltirgen zalal 67 mıllıon teńgeden astam somany qurady.
— Meniń tapsyrmammen bul joba el boıynsha aýqymy keńeıtildi, osyǵan uqsas Antı Call-ortalyqtary «Qazaqtelekom» AQ-men birlesip basqa da oblys ortalyqtarynda jáne respýblıkalyq mańyzy bar qalalarda qurylyp jatyr. Kıberqylmysqa qarsy kúres jumysy júıeli ınnovatsııalardy engizý arqyly jalǵasyn tabady, — dep túıindedi bas prokýror.
Buǵan deıin Qarjy naryǵyn retteý jáne damytý agenttigi eger atyńyzǵa alaıaqtyq kredıt resimdelse, ne isteý kerek ekenin aıtty.