Jasandy ıntellekt adamzatty joıyp jiberýi múmkin – Anthropic zertteýshisi
ASTANA. KAZINFORM – Anthropic kompanııasynyń zertteýshisi Djeıkob Kokson jasandy ıntellektini damytý jarysy jaýapsyz sıpat alyp bara jatqanyn aıtyp, bul tehnologııa bolashaqta adamzattyń joıylýyna ákelýi múmkin ekenin eskertti. Bul týraly Anadolu jazdy.
Kokson buǵan deıin OpenAI kompanııasynda da jumys istegen. Ol 8 qyrkúıekte Anthropic-ten ketip, jasandy ıntellekt ındýstrııasyndaǵy jumysyn toqtatqanyn jarııalady.
Zertteýshi OpenAI men Anthropic kompanııalary ózin-ózi jetildiretin sýperıntellekt jasaýǵa asyǵyp, qaýipsizdik máselesin tıisti deńgeıde eskermeı otyrǵanyn aıtty. Onyń pikirinshe, mundaı jarys adamzat úshin eleýli qaýip tóndirýi múmkin.
– Olar bizdiń ómirimizben oınap jatyr, – dep jazdy Kokson áleýmettik jelidegi jazbasynda.
Onyń aıtýynsha, jasandy ıntellekt salasynda jumys isteıtin adamdardyń ózderi bul tehnologııa adamzatqa joıqyn qaýip tóndirýi múmkin dep alańdaıdy. Koksonnyń pikirinshe, bul másele marketıngtik tásil emes, kompanııalardyń ishinde de joǵary laýazymdy basshylar men tájirıbeli zertteýshiler arasynda shynaıy alańdaýshylyq bar.
Djeıkob Koksonnyń sózin Anthropic kompanııasynyń qazirgi qyzmetkeri, Alignment bóliminiń jetekshisi Evan Hýbınger de qoldady. Ol jasandy ıntellekt aldaǵy on jyl ishinde búkil adamzatty joıyp jiberýi múmkin degen yqtımaldyqty 10%-dan joǵary dep baǵalaıtynyn aıtty.
Anthropic kompanııasy óz kezeginde jasandy ıntellekt úlken paıda ákelýmen qatar, buryn-sońdy bolmaǵan qaýipterge de ıe ekenin únemi ashyq aıtyp kele jatqanyn málimdedi. Kompanııa ókiliniń aıtýynsha, Anthropic jasandy ıntellekt modelderiniń qaýipsizdigin qamtamasyz etý úshin saladaǵy eń myqty qorǵanys sharalarynyń birqataryn qoldanady.
Kompanııa sondaı-aq modelderdiń qalaı jumys isteıtinin túsinýge baǵyttalǵan mehanıstik ınterpretatsııa salasynda zertteýler júrgizetinin jáne jasandy ıntellektiniń qaýipti múmkindikterin, sonyń ishinde kıberqaýipsizdik pen bıologııa salalaryndaǵy qaterlerdi turaqty túrde tekseretinin atap ótti.
Aıta keteıik, buǵan deıin Qytaı jasandy ıntellektini paıdalanýǵa qatysty jańa erejeler engizgenin jazdyq.
Sondaı-aq AQSh pen Qytaı jasandy ıntellekt qaýipsizdigi máselesinde kelissóz júrgizedi.
