Anthropic basshysy jasandy ıntellektiniń basty qaýipterin atady
ASTANA. KAZINFORM — Jasandy ıntellekt tehnologııalary baqylaýdan shyqqan jaǵdaıda jalpy adamzatqa qaýip tóndirýi múmkin. Bul týraly amerıkalyq tehnologııalyq kompanııa Anthropic bas dırektory Darıo Amodeı BUU Qaýipsizdik Keńesiniń jasandy ıntellekt máselesine arnalǵan otyrysynda málimdedi, dep habarlaıdy Report.
— Jasandy ıntellekt jalpy adamzatqa qaýip tóndirýi múmkin dep esepteımin, — dedi Amodeı.
Onyń aıtýynsha, jasandy ıntellekt óte jyldam damyp keledi. Tórt jyl buryn ǵana bul tehnologııalar kodtyń birneshe jolyn jazý jáne joǵary synyp oqýshylaryna arnalǵan matematıkalyq esepterdi shyǵarý deńgeıinde bolsa, qazir AI Anthropic kompanııasyndaǵy kodtyń basym bóligin jazyp, buryn sheshilmegen dep sanalǵan kúrdeli matematıkalyq esepterdi shyǵaryp otyr.
Amodeı qazirgi damý qarqyny saqtalsa, jasandy ıntellekt aldaǵy bir-eki jylda, tipti odan da erterek, ózi «data-ortalyqtaǵy danyshpandar eli» dep sıpattaǵan deńgeıge jetýi múmkin ekenin atap ótti.
Anthropic basshysynyń sózinshe, ozyq AI modelderi adamzatqa aıtarlyqtaı paıda ákelýi múmkin, alaıda olar eleýli qaýiptermen de qatar júredi. Ol negizgi eki qaterdi atady. Birinshisi — jasandy ıntellektini durys paıdalanbaý, sonyń ishinde bıoterrorısterdiń ony bıologııalyq qarý jasaý úshin qoldanýy. Ekinshisi — tehnologııalardy baqylaýdan aırylý qaýpi.
Amodeı Anthropic kompanııasy ázirlep jatqan JI tehnologııalarynyń qaýipsizdigin qamtamasyz etý úshin olardyń damýyn «qajet bolǵansha baıaýlatýǵa» daıyn ekenin aıtty.
Sonymen qatar ol JI-ge qatysty máselelerdi bir ǵana kompanııanyń sheshýi múmkin emes ekenin atap ótti. Onyń pikirinshe, bul úshin búkil sala men halyqaralyq deńgeıde birlesken tásil qajet.
Eske sala keteıik, buǵan deıin Anthropic kompanııasynyń zertteýshisi Djeıkob Kokson jasandy ıntellektini damytý jarysy jaýapsyz sıpat alyp bara jatqanyn aıtyp, bul tehnologııa bolashaqta adamzattyń joıylýyna ákelýi múmkin ekenin eskertken edi.
