Anthropic 2027 jylǵa qaraı JI-dyń baqylaýdan shyǵý qaýpi týraly eskertti
ASTANA. KAZINFORM – Claude JI-úlgileriniń otbasyn ázirleýshi Anthropic jetekshi álemdik zerthanalardy jasandy ıntellekttiń damýyn ýaqytsha baıaýlatýǵa shaqyrdy, dep habarlaıdy Kazinform.
Kompanııa aldaǵy jyldary tehnologııa is júzinde adamnyń aralasýynsyz jaqsara alatyn deńgeıge jetýi múmkin dep sanaıdy, dep jazdy DW.
Bul eskertý Anthropic-tiń naryqtyq quny 965 mlrd dollarǵa jetkennen keıin jasaldy.
Jarııalanǵan málimdemede jasandy ıntellekttiń damý qarqyny óte jyldam bolyp qala beretini aıtylǵan. Anthropic baǵalaýynsha, 2027 jylǵa qaraı JI júıeleri kúrdeli tapsyrmalardy birneshe saǵat nemese kún ishinde oryndaı alady, al adamdarǵa oǵan birneshe apta qajet.
Kompanııa tehnologııalyq jetistikterdiń yqtımal áserin baǵalaý jáne qaýipsizdik tetikterin ázirleý úshin álemge qosymsha ýaqyt qajet dep sanaıdy. Eger osy tehnologııanyń damýyn baıaýlatýdyń jáne onymen baılanysty máselelerdi sheshýge kóbirek ýaqyt bólýdiń tıimdi joly bolsa, bul paıdaly bolar edi, dep málimdedi Anthropic ókilderi.
Kompanııa jasandy ıntellekttiń damýyn qarýlandyrýdy baqylaý máselelerimen salystyrdy. Claude ázirleýshileriniń pikirinshe, ártúrli elderdegi iri zertteý ortalyqtary birdeı sharttarda óz jumystaryn ýaqytsha shekteý týraly kelise alady.
Bul rette Anthropic AQSh pen Qytaı arasyndaǵy tehnologııalyq básekelestikke baılanysty mundaı bastamany júzege asyrý qıyn bolatynyn moıyndady.
Keıbir sarapshylar mundaı málimdemelerge kúmánmen qaraıdy. Brıtandyq The Daily Telegraph gazeti sarapshylarǵa silteme jasaı otyryp Anthropic kompanııasy JI-dyń damý jyldamdyǵyn asyra siltep kórsetýi múmkin dep jazdy. Olardyń pikirinshe, mundaı eskertýler salany retteýge áser etýi jáne kompanııanyń básekelesteri úshin qosymsha qıyndyqtar týdyrýy múmkin.
Osyǵan deıin Anthropic JI salasyndaǵy eń qymbat startapqa aınalǵanyn jazdyq.
Kompanııa sońǵy qarjylandyrý kezeńinde 65 mlrd dollar jınap, nátıjesinde quny 965 mlrd dollarǵa artty.
