Antarktıka muzynyń kólemi kishireıip, «tarıhı mınımým» deńgeıge jetti
Dúnıejúzilik meteorologııalyq uıymnyń (DMU) habarlaýynsha, jahandyq deńgeıde osymen besinshi jyl qatarynan aqpan aıy óte jyly boldy. Ekstremaldy temperatýra jáne jaýyn-shashyn kóp boldy, al Eýropada ekinshi eń jyly qys tirkeldi.
Teńiz muzy jahandyq, aımaqtyq jáne jergilikti aýa raıyna úlken áser etedi. Bul Dúnıejúzilik meteorologııalyq uıymnyń jahandyq klımattyń jaı-kúıi týraly esebindegi negizgi klımattyq kórsetkish. Teńiz muz aımaǵynyń ózgerýi ekojúıeler men qoǵam úshin aýyr zardapqa ákelýi múmkin.
Arktıkanyń jylynýy ortasha jahandyq jylynýdan eki ese jyldam júrýde. Nátıjesinde arktıkalyq teńiz muzy 45 jyldyq spýtnıktik baqylaý barysynda kúrt tómendedi. Baqylaý tarıhynda aqpandaǵy qystyń sońǵy aıazynda teńiz muzynyń aýdany rekordtyq deńgeıde tómendedi.
Qańtar men aqpanda antarktıkalyq teńiz muzy kóleminiń tómendeýi rekordtyq deńgeıge jetti. Aqpannyń aıaǵynda muz 1,83 mıllıon sharshy shaqyrymdy qurady. Bul 2022 jyldyń aqpanynda tirkelgen rekordtyq eń tómengi deńgeıden 93000 sharshy shaqyrymǵa tómen.
Ótken jyly Antarktıdadaǵy teńiz muzynyń aýdany jalpy alǵanda tómen boldy. Al jańa muz ádettegiden juqa ári synǵysh keldi. Sonymen qatar, Antarktıka túbegi (Ońtústik Amerıkaǵa jaqyn soltústik-batys sheti) planetanyń eń jyldam jylynatyn aımaqtarynyń biri – sońǵy 50 jyl ishinde shamamen 3°C.
Eske salsaq, buǵan deıin Antarktıdadaǵy Brant shelftik muzdyǵynan kólemi Úlken Londonmen birdeı aısberg bólingeni týraly habarlaǵan edik.