Antarktıdany jalǵyz júrip ótken brıtandyq zertteýshi qaıtys boldy
ASTANA. QazAqparat - Antarktıdadan jalǵyz ózi ótpek bolǵan brıtandyq jıhankez Genrı Ýorslı (Henry Worsley) mejeli jerine jete almady, saparynyń aıaqtalýyna 50 shaqyrym qalǵanda ol qaıtys boldy, dep jazady marqumnyń týystarynyń málimdemesine silteme jasaǵan brıtandyq Guardian gazeti.
Basylymnyń habarlaýynsha, saıahatshy kómekke shaqyrǵan belgini saparynyń 71-shi kúni jibergen. Oǵan saıahatshynyń aǵzasynda sý mólsheriniń azaıyp ketýi, álsireýi sebep bolǵan. Juma kúni 55 jastaǵy burynǵy áskerı qyzmetker Ýorslıdi tikushaqpen Chılıdiń Pýnta-Arenas qalasynyń aýrýhanasyna jetkizdi, onda oǵan bakterıalyq perıtonıt dıagnozy qoıyldy. Ota jasalǵanymen, jeksenbi kúni jıhankez kóz jumdy, dep habarlaıdy brıtan basylymy.
Gazet brıtandyqtyń sapary aýa raıynyń jaısyz kezine tap bolǵanyn jazady, bul kezde Antarktıdada aýanyń temperatýrasy -44 gradýsqa deıin tómendegen.
