Antarktıdada qoryq ashylýy múmkin
ASTANA. QazAqparat - Jasyl álemdi qoldaıtyn «Grınpıs» uıymynyń mamandary Antarktıdada qoryq ashý týraly bastama kóterdi, dep habarlaıdy Habar 24 telearnasy.
Qoryqtyń kólemi eki mıllıon sharshy shaqyrym aýmaqty qamtıdy. Eger bastama qoldaý taýyp, júzege asatyn bolsa, bul jer jabaıy janýarlarǵa qorǵan bolatyn álemdegi eń úlken qoryqqa aınalady.
Qazir ǵalymdar aımaqtyń ekologııalyq ahýalyn zertteýge kirisken. Olar jahandyq jylynýdyń Antarktıdaǵa áseri qandaı lastaný deńgeıi qanshalyqty jyldam jáne tylsym tabıǵattyń úılesimdiligin baqylaýǵa kirisken. Al qoryq qurý týraly joba Eýropalyq odaqtyń qaraýyna usynyldy. Ol qazan aıynda Aýstrııada ótetin konferentsııada talqylanbaq. Qazirdiń ózinde Germanııa úkimeti qoldaý bildirip otyr.
«Qazir balyq aýlaýmen aınalysatyn kompanııalardyń is-áreketin baqylap otyrmyz. Basym bóligi usaq shaıandardy aýlaýǵa bet burǵan. Al bul shaıandar - teńiz janýarlarynyń negizgi azyǵy. Sondyqtan olardyń azaıyp ne joıylyp ketýi ózgelerine keri áser etýi de múmkin», dep málim etti ekolog Ýıll Makmıllan.
