Antalıany afrıkalyq shań basyp, aspan qyzǵylt sary túske boıaldy
ASTANA. KAZINFORM — Antalıada sırek kezdesetin tabıǵı qubylys qalypty kórinisti múlde ózgertip, peızajdy Mars ǵalamsharyna uqsatyp jiberdi. Soltústik Afrıkadan kelgen qumdy shań aspandy qyzǵylt-sary túske boıap, «las jańbyrdyń» jaýýyna sebep boldy. Bul jaǵdaı jergilikti turǵyndardyń turmysyn qıyndatty, dep Kazinform agenttiginiń Ankaradaǵy tilshisi habarlady.
GZT basylymynyń málimetinshe, Túrkııanyń Antalıa provıntsııasynda, ásirese Alanıa aýdanynda Soltústik Afrıkadan kelgen shań massalarynyń taralýy baıqalǵan. Aýadaǵy usaq bólshekterdiń kóp bolýyna baılanysty aspan qoıý qyzǵylt-sary-qyzyl túske engen, al kóriný deńgeıi aıtarlyqtaı tómendegen.
Qala ústin qalyń shań bulty basyp, qoıý tuman áserin týdyrǵan. Jaǵalaý, teńiz jáne bıik ǵımarattar kózge áreń kórinip, aınalany erekshe, tipti sıýrrealıstik kóriniske aınaldyrǵan. Jergilikti turǵyndar bul qubylysty tańdanyspen baqylaǵan.
Jaǵdaıdy jańbyr odan ári ýshyqtyrdy: jaýǵan jańbyr aýadaǵy shańmen aralasyp, «las jańbyrǵa» aınalǵan. Joldarda qońyr tústi shalshyqtar paıda bolyp, kólikter men kósheler jabysqaq shań qabatymen qaptalǵan.
Ásirese júrgizýshilerge qıyn bolǵan – joldar taıǵaq ári las bolǵandyqtan, kólik qozǵalysy qıyndaǵan. Kólik ıelerine sarǵysh-qońyr qabatpen jabylǵan mashınalaryn tazalaýǵa kóp ýaqyt jumsaýǵa týra kelgen.
Mundaı qubylystar sırek bolǵanymen, bul óńir úshin tańsyq emes. Sahara shólinen shańnyń Jerorta teńizi elderine jetýi belgili bir aýa raıy jaǵdaılarynda ara-tura bolyp turady. Bul aýa sapasyna da, adamdardyń kúndelikti ómirine de áser etedi.
Buǵan deıin Túrkııada klımattyń ózgerýi tabıǵı tepe-teńdikti buzyp jatqany aıtylǵan edi. Ǵasyrlar boıy taý shyńdaryn japqan muzdyqtar jyldam erip, olardyń ornynda tastar, bulaqtar jáne alańdatarlyq boljamdar qalyp otyr.
Ystanbul klımattyq qaýipterge qarsy sharalardy kúsheıtpek.
