Antalıada polıtsııa keıpine engen qaskóıler 4 mln dollarlyq krıptoaktıvti urlady

ASTANA. KAZINFORM — Antalıa qalasynda qylmyskerler ózin polıtsııa qyzmetkerleri retinde tanystyryp, vıllaǵa kirip, mıllıondaǵan dollarlyq krıptovalıýtany urlap ketken, dep habarlaıdy Kazinform agenttiginiń menshikti tilshisi.

Antalıanyń Muratpasha aýdanynda qaskóıler toby resmı polıtsııa operatsııasy retinde jasyrylǵan, muqııat josparlanǵan tonaýdy júzege asyrdy. Tańerteń erte alty adam polıtsııa formasy men jıletterin kıip, vıllaǵa kelip, jalǵan kýálikterin kórsetip, sot qaýlysy bar ekenin málimdegen.

Úıge kirgennen keıin «quqyq qorǵaýshylar» úı ıesine tıesili sýyq ámııanda saqtalǵan krıptoaktıvterdi ózderi baqylaýda ustaıtyn shottarǵa aýdaryp jibergen. Keltirilgen shyǵyn shamamen 4 mıllıon AQSh dollaryn quraǵan. Olar ketip bara jatyp beınebaqylaý jabdyqtaryn alyp ketkenimen, izderin tolyq jasyra almaǵan — áreketteriniń bir bóligi kameralarǵa túsip qalǵan.

Jábirlenýshiniń aryzynan keıin polıtsııa tergeý bastap, kúdiktilerdiń izine túsken. Nátıjesinde barlyǵy 13 adam ustaldy, olardyń arasynda Konıaalty aýdanynda qyzmet etetin polıtsııa qyzmetkeri men burynǵy quqyq qorǵaý organynyń qyzmetkeri bar.

Haberturk.com túrik basylymynyń jazýynsha, is boıynsha shetel azamattary da kúdikke ilingen: Reseıdiń eki azamaty, Qazaqstannyń bir azamaty jáne Belgııanyń eki azamaty. Bir reseılik pen eki belgııalyq Túrkııadan ushyp ketpek bolǵan sátinde áýejaıda ustalǵan kórinedi.

Sot 10 kúdiktini qamaýǵa alý, al qalǵan úsheýin sot baqylaýymen bosatý týraly sheshim shyǵardy.

Tintý barysynda kúdiktilerden qarý-jaraq, qolma-qol aqsha, ratsııa, jalǵan polıtsııa atrıbýttary jáne tipti International Police Association kýáligi tárkilendi.

Buǵan deıin Bas prokýratýra men Interpol Ulttyq ortalyq bıýrosy QR Syrtqy ister mınıstrliginiń járdemdesýimen Túrkııa Respýblıkasynan birneshe ret alaıaqtyq jasaǵany úshin halyqaralyq izdeýde júrgen Qazaqstan azamatyn elge qaıtarǵanyn jazǵanbyz.