Buqaralyq shańǵy tebý: Astanada qysqy sport túrleriniń maýsymy bastaldy

ASTANA. KAZINFORM – Bıyl Astanaǵa qys erte túsip, qala turǵyndary qystyq sport túrleriniń maýsymyna kirisip ketti. Aıdyń ortasynda «Alaý» muz aıdynynda konkımen júgirý maýsymy resmı túrde bastalsa, búgin Ortalyq saıabaqta shańǵy tebýden alǵashqy jarys ótti, dep habarlaıdy qala ákimdiginiń resmı saıty.

«Byltyr qys kesh túsip, jeltoqsan aıynyń aıaǵynda ǵana shańǵy tebý maýsymyn bastap edik. Bıyl qar erte jaýyp, aýa raıy qarashanyń ózinde qysqy sportqa qolaıly bolyp otyr. Búgingi is-sharamyz resmı shańǵy maýsymynyń ashylýy dep aıta almaımyn. Maýsym 18 jeltoqsanda bastalady. Áıtse de, búgingi sporttyq is-sharamyzǵa 200-deı qatysýshy jınaldy. Jaman emes. Jazda júgirý tanymaldylyqqa ıe bolsa, qysta shańǵy tebý turǵyndar tarapynan suranysqa ıe. Sportty serik etip, demalysty jaqsy kóńil kúımen ótkizińizder», - dedi jarystyń bas tóreshisi Dáýlet Hamzın.

Іs-sharaǵa nıet bildirgenniń bári qatysyp, ár qatysýshy óziniń shańǵysyn ala keldi. Al birinshi márte qyzyǵýshylyqpen kelgender 2 000 teńgege jalǵa alyp, osy sporttaǵy alǵashqy qadamdaryn jasady.

Aıta keteıik, Ortalyq saıabaqta jumys kúnderi keshki 19:00 men 21:00 aralyǵynda shańǵyny jalǵa alyp, óz betińizshe úırenseńiz bolady. Al jattyqtyrýshynyń kómegi qajet deseńiz, balalar úshin 35 myń teńge, eresekter úshin aıyna 40 myń teńge bolatyn sektsııa da qarastyrylǵan.

«10 jyldan beri shańǵy tebýmen turaqty aınalysamyn. Ózim polıtsııa qyzmetkerimin. Sondyqtan osy sport túrin tańdadym. Aptasyna turaqty túrde 3-4 márte tebemin. Shańǵy búkil deneniń qımyldaýyna áser etetindikten, qolym da, aıaǵym da babynda», - dedi qala turǵyny Jomart Boranbaev.

Endi aldaǵy ýaqytta ár apta saıyn demalys kúnderi Ortalyq saıabaqta salaýatty ómir saltyn ustanatyn adamdar men taza aýada belsendi demalýdy unatatyndar arasynda shańǵy sportynan jarystar uıymdastyrylatyn bolady.