Antalıa týrıster sanynyń azaıýynan qomaqty qarjydan qaǵyldy
ASTANA. KAZINFORM — Túrkııanyń tanymal týrıstik baǵyty Antalıaǵa 2026 jyldyń segiz aıynda 10,76 mln demalýshy barǵan. Bul byltyrǵy osy kezeńmen salystyrǵanda 6% az. Óńirdiń týrıstik salasyndaǵy shyǵyn júzdegen mıllıon eýroǵa baǵalanyp otyr, dep habarlaıdy Kazinform agenttiginiń Ankaradaǵy menshikti tilshisi.
Túrkııalyq Ekonomim basylymynyń jazýynsha, qańtar-tamyz aılarynda Antalıaǵa 2025 jyldyń sáıkes kezeńimen salystyrǵanda 664,5 myń týrıst az kelgen. Shetelde turatyn túrik azamattarynyń sany da 2% tómendep, 706,9 myń adam bolǵan.
Bul rette jekelegen naryqtardaǵy kórsetkishter aıtarlyqtaı erekshelendi. Reseıden barǵan týrıster sany byltyrǵy deńgeıde saqtalyp, shamamen 2,17 mln adam boldy. Ýkraınadan baratyn týrıster aǵyny 5%-ǵa ósip, 306,8 myń adamǵa jetti. Izraıldik týrıster sany 59%-ǵa artty. Al Irannan barǵan týrıster sany 73%-ǵa azaıdy.
Sala ókilderin ásirese Eýropa naryǵyndaǵy ahýal alańdatyp otyr. Antalıa úshin mańyzdy naryq bolyp esepteletin Germanııa, Ulybrıtanııa, Polsha jáne Nıderlandtan keletin týrıster sany tómendegen. Naryq ókilderi buǵan shyǵyndardyń ósýin, valıýta baǵamynyń ózgerýin jáne Eýropada Túrkııanyń tym qymbat baǵyt degen túsiniktiń taralýyn sebep retinde atap otyr.
Týrıster aǵynynyń tómendeýi tabysqa da áser etip jatyr. Sala ókilderiniń baǵalaýynsha, Antalıanyń shyǵyny 600-700 mln eýroǵa jetýi múmkin. Alaıda keıbir sarapshylar budan saq baǵalaýdy usynyp otyr. Olardyń pikirinshe, týrıster sanynyń azaıýyn bir adamǵa shaqqandaǵy shyǵyndardyń ósýi ishinara óteıtindikten, naqty tabys kóleminiń tómendeýi 350-500 mln dollar aralyǵynda bolýy múmkin.
Keıbir sarapshylar jyl sońyna qaraı týrıster sanynyń azaıýy 1 mln adamǵa jetýi múmkin dep boljaıdy. Týrıster orta eseppen jeti kún bolyp, kúnine shamamen 100 eýro jumsaıdy degen eseppen, tek qonaqúı sektorynyń ózi shamamen 700 mln eýro tabystan qaǵylýy yqtımal.
Antalıa qalalyq keńesiniń Týrızm tobynyń jetekshisi Redjep ıAvýz óńirdiń shyǵynyn paket týrlar, áýe tasymaly jáne týrısterdiń jeke shyǵyndaryn qosa eseptegende shamamen 620 mln eýro dep baǵalap otyr.
Sala ókilderiniń pikirinshe, 2026 jyl Antalıa týrızmi úshin 2022-2024 jyldardaǵy ósim kezeńi men 2025 jylǵy toqyraýdan keıingi aıtarlyqtaı quldyraý baıqalǵan alǵashqy jyl bolýy múmkin. Halyqaralyq básekeniń kúsheıýine baılanysty sarapshylar týrıster sanymen ǵana shektelmeı, týrızmniń tabystylyǵyna jáne týrıstik baǵytty basqarý sapasyna da nazar aýdarýǵa úndeıdi.
Eske salaıyq, buǵan deıin 2026 jyldyń ekinshi toqsanynda Túrkııanyń týrızm salasynan túsken tabysy byltyrǵy osy kezeńmen salystyrǵanda 2,6% paıyz azaıǵanyn habarlaǵanbyz.
