Antalııadaǵy Jambyl saıabaǵynda Dombyra eskertkishi ornatyldy - sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Qytaılyq drondar 6000 metr bıiktiktegi Everest taýyna zattar jetkizdi - «Halyq gazeti»
5 maýsymda tanymal ushqyshsyz ushaq kompanııasy Shenzhen Dajiang Innovation Technology Co., Ltd jarııalaǵan málimetterge sáıkes, jaqynda kompanııa basqa mekemelerdiń kómegimen Djomolýngma(Everest) taýynyń Nepal jaǵynda azamattyq drondardyń teńiz deńgeıinen asa bıiktikte zat tasý synaǵyn aıaqtady, dep habarlaıdy Qytaıdyń «Halyq gazeti».
Qytaılyq basylymnyń keltirgen derekterine súıensek, bul sondaı-aq teńiz deńgeıinen 5300 metrden 6000 metrge deıingi bıiktikte azamattyq drondardyń qos baǵytta zat tasymaly boıynsha álemdegi alǵashqy synaǵy. Ol azamattyq drondardy eń joǵary bıiktikte tasymaldaý boıynsha rekord ornatty.
Sonymen qatar osy aptada «Halyq gazeti» basylymynda «Vızasyz rejımniń yqpalymen Qytaıǵa saıahattaıtyn sheteldikter sany kóbeıdi» degen taqyryptaǵy aqparat jaryq kórdi.
Qytaılyq basylymnyń dereginshe, sheteldikterdiń Qytaıǵa kelýin jeńildetýge baǵyttalǵan «72/144 saǵattyq tranzıttik vızasyz rejım» sııaqty birqatar sharanyń arqasynda sheteldikterdiń Qytaıǵa saparlary qyza túsken.
Ulttyq ımmıgratsııa basqarmasy 5 shildede osy jyldyń birinshi jartyjyldyǵynda búkil el boıynsha ártúrli porttardan 14,635 mıllıon sheteldik kirgenin habarlady, bul ótken jyldyń sáıkes kezeńimen salystyrǵanda 152,7%-ǵa ósken. Olardyń ishinde elge vızasyz kirgender 8,542 mıllıon adam boldy, bul ótken jyldyń sáıkes kezeńimen salystyrǵanda 190,1%-ǵa ósti.
«2024 jyldyń birinshi jartyjyldyǵynda Beıjiń porty barlyǵy 307 000 sheteldik týrıske vızasyz rejım qyzmetin kórsetti jáne 33 700 sheteldik týrıske 144 saǵattyq tranzıttik vızasyz rejım berdi, bul ótken jyldyń sáıkes kezeńimen salystyrǵanda tıisinshe 10,12 ese jáne 7,24 ese ósti», dep jazdy qytaılyq BAQ.
Islam Keńesi Tóraǵasy men Qazaqstan Senaty Tóraǵasy BRIKS otyrysy aıasynda kezdesti - Parstoday
Sankt-Peterbýrgte BRIKS spıkerleriniń kezdesýi ótip jatyr. Muhammad Baqer Qalıbaf pen Qazaqstan Senatynyń tóraǵasy Máýlen Áshimbaev Sankt-Peterbýrgte ótken BRIKS spıkerleriniń kezdesýi aıasynda kezdesip, áńgimelesti.
Bul týraly osy aptada Irannyń «Parstoday» aqparat agenttigi de habarlady.
«Máýlen Áshimbaev Qazaqstan men Iran arasyndaǵy qarym-qatynastar kóptegen salalarda qarqyndy damyp kele jatqanyn atap ótti», dep jazdy ırandyq BAQ.
Aıta keteıik, ótken aptada «Parstoday» aqparat agenttiginde «Qazaqstan Elshisi Iran Prezıdentiniń mindetin atqarýshyǵa senim gramotasyn tapsyrdy» degen taqyryptaǵy aqparat jarııalanǵan bolatyn.
Qazaqstan Elshisiniń senim gramotasyn Iran Prezıdentiniń mindetin atqarýshy Mohammad Mohberǵa tapsyrý rásiminde, Mohammad Mohber Soltústik-Ońtústik dáliziniń qurylýy Iran men Qazaqstan jáne aımaqtaǵy basqa elder arasyndaǵy yntymaqtastyqty ilgeriletýge úlken áser etedi, degen. Al Qazaqstan Elshisi eki eldiń jeke sektorlaryn belsendirý ózara áleýetti jandandyrý úshin mańyzdy ekenin aıtqan.
Antalııadaǵy saıabaqqa Dombyra eskertkishi ornatyldy - TRT
Antalııadaǵy Jambyl Jabaev atyndaǵy saıabaqta dástúrli mýzykalyq aspap dombyra eskertkishi ornatyldy, dep habarlaıdy Túrkııa Radıo Televızııa portaly.
Túrkııalyq BAQ-tyń keltirgen málimetine súıensek, Kepez mýnıtsıpalıtetiniń uıymdastyrýymen ótken sharaǵa Antalııa gýbernatory Hýlýsı Shahın, Qazaqstannyń Túrkııadaǵy elshisi Erkebulan Sápıev, Kepez qalasynyń meri Mesýt Kojagóz, Antalııada turatyn qazaqstandyqtar men túrik aǵaıyndar qatysty.
Atalǵan is-sharaǵa qatysqan gýbernator Shahın betashar sózinde «Dombyra kúni» sharasy aıasynda Qazaqstan halqymen qaýyshqanyna qýanyshty ekenin aıtqan.
Dombyranyń Anadolydaǵy baǵlama, saz, kýra jáne tambýr aspaptarynyń atasy ekenin túsindirgen Shahın «Túrik mádenıeti myńdaǵan jyldar boıy keń terrıtorııaǵa taralyp, qurlyqtar arasyndaǵy úlken baýyrlastyq kópiri boldy» dedi.
«Ókiletti elshi Sápıev aptap ystyqqa qaramastan baýyrlas eki el ókilderiniń saıabaqta bas qosqanyna qýanyshty ekenin atap ótti. Sápıev «Dombyra qazir qazaqtyń aspaby ǵana emes, búkil túrik áleminiń sımvoly bolyp tabylady. Ornatylǵan músin endi balalarymyz ben urpaqtarymyzǵa baýyrmaldyqtyń, yntymaq pen birliktiń sımvol bolady» dedi», dep jazady túrkııalyq basylym.
Sondaı-aq osy aptada «TRT» basylymynda «Stambýlda «Dombyra kúni» atap ótildi» degen taqyryptaǵy aqparat jaryq kórdi.
Qazaqstannyń Stambýldaǵy Bas konsýldyǵy Stambýlda «Ulttyq dombyra kúnin» atap ótti.
Túrkııalyq BAQ-tyń dereginshe, Abaı alańyndaǵy sharada aldymen Túrkııa men Qazaqstannyń memlekettik ánurandary shyrqaldy. Qazaqstannyń Stambýldaǵy bas konsýly Nurıddın Amanqul osynda sóılegen sózinde dombyrany qazaq halqynyń murasy retinde keleshek urpaqqa jetkizýdiń mańyzdylyǵyna toqtalǵan. Shilde aıynyń birinshi jeksenbisiniń «Dombyra kúni» retinde toılanatynyn aıtqan Amanqul Stambýldyń Zeıtınbýrný men Bagjylar aýdandarynda ashylǵan dombyra kýrstaryna qyzyǵýshylyqtyń zor ekenin atap kórsetti.
Sharada dombyra kýrsynda oqıtyn oqýshylar shaǵyn kontsert qoıǵan.
Ózbekstanǵa shetelden oqýǵa kelgenderdiń sany 65 paıyzǵa ósti - «ÓzA»
2024 jyldyń qańtar-mamyr aılarynda Ózbekstanǵa jalpyy 7400 shetel azamaty oqýǵa kelgen. Statıstıka agenttiginiń málimetinshe, bul kórsetkish ótken jyldyń sáıkes kezeńimen salystyrǵanda 2,9 myń adamǵa nemese 65,2 paıyzǵa artqan, dep habarlaıdy ózbekstandyq «ÓzA» aqparattyq agenttigi.
Atalǵan BAQ-tyń málimetinshe, bıylǵy jyldyń qańtar-mamyr aılarynda Ózbekstanǵa oqýǵa kelgen shetel azamattarynyń qaı elden kelgeni boıynsha sany jarııalanǵan. Atap aıtqan Ózbekstanǵa shetelden kelip oqıtyndardyń eń kóbi Úndistan eken(2241 adam), ekinshi orynda Túrkimenstan (1937 adam). Odan ary qaraı Tájikstan(950 adam), Qyrǵyz Respýblıkasy(450 adam) bolyp kete beredi. Al Qazaqstannan bıylǵy jyldyń qańtar-mamyr aılarynda Ózbekstanǵa oqýǵa 122 adam oqýǵa kelgen.
Parıj Olımpıadasyna qatysyatyn Shyńjańdyq bes sportshynyń ekeýi qazaq – CNR
Jaqynda Qytaıdyń árbir óńiri Parıj Olımpıadasyna qatysý tizimin jarııalady. 2024 jyly Parıjde ótetin álemdik dodaǵa Shyńjańnan 5 sportshy qatysady.
Bul týraly Qytaıdyń «Ortalyq halyq radıosy» aqparattyq agenttigi Shyńjań ólkelik sport bıýrosyna silteme jasap habarlady.
Qytaılyq basylymnyń dereginshe, tórt jylda bir ótetin álemdik báıgege 25 mıllıonnan astam halqy bar Shyńjańnan 5 sportshy iriktelgen. Olar qytaılyq erler boksynan 80 keli salmaqtaǵy Toqtarbek Tańathanuly, jaǵajaı voleıbolynan Qytaı áıelder quramasynyń ókili Sıa Sını, Qytaı áıelderiniń sadaq atý komandasynan An Tsısýan, erkin kúresten 97 keli salmaqta Qytaı quramasy erlerdiń erkin kúres sheberi qandasymyz Kabıran Abýshaımanuly jáne Qytaı áıelder basketbol komandasynyń oıynshysy Vý Tongtýng.
