Antalııada tólqujatsyz qalyp qoıǵan 15 jastaǵy qyz Qazaqstanǵa oraldy
NUR-SULTAN. QazAqparat – Antalııanyń áýejaıynda tólqujatsyz qalyp qoıǵan 15 jastaǵy qazaqstandyq qyz búgin elge oraldy. Bul týraly QazAqparat tilshisine qyzdyń anasy Asyl Nesipbaeva aıtyp berdi.
Onyń aıtýynsha, kámeletke tolmaǵan balany bóten elde qaldyryp ketken senimdi ókiline qatysty qylmystyq is qozǵalǵan.
«Qyzym Qazaqstanǵan jetti. Qazir ol úıge kólikpen kele jatyr. Bizge QR Syrtqy ister mınıstrligi kómek kórsetti. Ol týrıstermen birge qonaq úıde boldy», - dep túsindirdi jasóspirimniń anasy.
Onyń sózine qaraǵanda, Konsýldyq balanyń elimizge saparlaýy úshin anyqtama bergen. Osy qujat arqyly ol Qazaqstanǵa attandy.
«Bizdiń mınıstrlik ókilderi qyzymdy ushaqtyń bortyna deıin aparyp, mingizdi. Osy oraıda Syrtqy ister mınıstrligi qyzmetkerleri balamnyń kimmen, qashan jáne qalaı baratynyn tyńǵylyqty naqtylap berdi», - dedi A. Nesipbaeva.
Túrkııada oqshaýlaýǵa jatqyzylǵan qyzdyń ákesi bul oqıǵanyń mán-jaıynan habardar eken. Sonymen qatar burynǵy kúıeýiniń qazirgi zaıybymen Asyl Nesipbaeva baılanysqa shyqqan.
«Men ony áýejaıda qarsy aldym. Ony jaýapqa tartýǵa qatysty polıtsııaǵa shaǵym túsirdim. Saǵat 18:35 kezinde ol elge ushaqpen keldi. Sol jerden ony birden polıtsııaǵa jetkizdi. Polıtsııa meni jábirlenýshi retinde tirkedi. Atalǵan oqıǵaǵa qatysty qylmystyq is qozǵaldy», - dedi balanyń anasy.
Onyń atap ótýinshe, qyzdyń ógeı anasy bul jaǵdaıda balanyń ózi tólqujatyn joǵaltyp alǵanyn aıtyp aqtalǵan.
«Biz Tomırısti (qyzdyń esimi) kútip otyrmyz. Odan osynyń mán-jaıyn tolyq surastyramyn», - dedi A. Nesipbaeva.
Budan buryn habarlanǵandaı, jaqynda 15 jastaǵy qazaqstandyq qyzdy senimdi ókili Túrkııadaǵy Antalııanyń áýejaıynda qaldyryp ketken.
Belgili bolǵandaı, atalǵan senimdi ókil qyzdyń ákesimen azamattyq nekede eken. Olar Túrkııadan Qazaqstanǵa attanar aldynda jetkinshektiń pasporty joǵalǵany anyqtaldy.
Óz kezeginde qyzdyń anasy Asyl bul oqıǵanyń mán-jaıyn aıtyp berdi.
«Meniń balam burynǵy kúıeýimniń otbasymen Túrkııada demalýǵa barǵan edi. Osy oraıda senimhat burynǵy kúıeýimniń zaıybyna jazylǵan edi, sebebi olar bir kún buryn (5-inen 6 tamyzǵa qaraǵan túni) saparlaýǵa tıis edi. Al qyzymnyń ákesi eki kúnnen keıin Túrkııaǵa barmaqshy boldy. Sondyqtan senimhatty berip, bala aman-esen jetti. Al Qazaqstanǵa shyǵar kezde, elge orala almaı qaldy. Saǵat 10:30 kezinde maǵan habarlasyp, áýejaıda qalǵanyn aıtty. Ógeı anasy balanyń tólqujatyn joǵaltyp alǵan», - dedi qyzdyń anasy.
