Antalııada mıgranttar mingen qaıyq pen kater soqtyǵysyp, 14 adam qaza tapty
ASTANA. KAZINFORM — Túrkııanyń Antalııa provıntsııasyndaǵy Demre aýdany jaǵalaýynda toqtaý týraly talapqa baǵynbaı qashýǵa tyrysqan qaıyqtyń jaǵalaý kúzeti katerimen soqtyǵysýy saldarynan 14 zańsyz mıgrant kóz jumdy, dep habarlaıdy Anadoly agenttigi.
Antalııa gýbernatory Hýlýsı Shahınniń dúısenbi, 9 naýryz kúni ótken brıfıngte aıtýynsha, tańǵy saǵat shamamen 06:00–de Demre aýdanyna qarasty Beımelek shaǵyn aýdanynyń jaǵalaýynda ishinde zańsyz mıgranttary bar qaıyq anyqtalǵan. Olardyń arasynda Aýǵanstannan kelgen áıelder men balalar da bolǵan.
Gýbernatordyń aıtýynsha, jaǵalaý kúzeti toqtaý týraly talap qoıǵanymen, qaıyq toqtamaı, joǵary jyldamdyqpen manevr jasap qashýǵa tyrysqan. Sonyń saldarynan qaıyq jaǵalaý kúzeti katerimen soqtyǵysqan.
— Mıgranttardyń bir bóligi teńizge qulap ketti. Qaıyqta qalǵandardyń keıbiri jaǵalaýǵa jetkenimen, shuǵyl medıtsınalyq kómekti qajet etti. Jaǵalaýǵa jetken 14 zańsyz mıgrant jandarmerııa bólimsheleri tarapynan ustaldy, — dedi Shahın.
Sonymen qatar, onyń aıtýynsha, jaǵalaý kúzeti qyzmetkerleri taǵy 7 mıgrantty qutqaryp, olarǵa jedel járdem brıgadalary alǵashqy medıtsınalyq kómek kórsetken.
Oqıǵa saldarynan teńizge batyp ketken 14 adamnyń máıiti tabyldy. Qazirgi ýaqytta jaǵalaý kúzeti men jandarmerııa bólimsheleri qurlyqta, teńizde jáne áýede izdestirý-qutqarý jumystaryn jalǵastyryp jatyr.
Buǵan deıin habarlanǵandaı, Italııa mıgratsııalyq saıasatty qatańdatyp, teńiz blokadasyn engizedi.
