Antalııada qazir tynysh, alaıda, kóshelerde qaýipsizdikti kúsheıtip jatyr - Túrkııadaǵy qazaqstandyq týrıst
ASTANA. QazAqparat - Túrkııaǵa saıahattap ketken qazaqstandyq azamat, «Tamerlan» týrıstik kompanııasynyń dırektory Talǵat Lázzatuly QazAqparat tilshisine suhbat berip, bolǵan oqıǵa jaıynda jáne ózderimen birge júrgen qazaqstandyqtar týraly aıtyp berdi.
- Sizder Túrkııanyń qaı qalasynda júrsizder?
- Biz Antalııa qalasyndamyz.
- Keshegi bolǵan oqıǵa jaıynda ne aıta alasyz, amansyzdar ma?
- Iá, bizde bári jaqsy. Bolyp jatqan oqıǵanyń barlyǵy Ystambul men el astanasy Ankarada bolyp jatyr. Al Antalııada qazir tynyshtyq. Alaıda, kóshelerde qaýipsizdikti barynsha kúsheıtip jatyr.
- Túrkııaǵa qashan baryp edińizder, qansha adamsyzdar?
- Túrkııaǵa kelgeli búgin segizinshi kún. Bir aptaǵa demalyp qaıtýǵa 8 adam kelgen bolatynbyz. Negizi búgin elge oralatyn kúnimiz bolatyn. Reıs kútip jatyrmyz. Qazaqstanǵa ushatyn ushaq dál qazir joq eken. Osydan birer saǵat buryn áýejaıǵa barmaqshy bolyp jınalyp shyqqan edik. Ókinishke qaraı, joldan qaıtadan qonaqúıge keri qaıtardy.
- Túrkııadaǵy Qazaqstan elshiligi tarapynan bir nusqaýlar boldy ma?
- Ózimiz elshilikke qabarlaspadyq. Kútip alýshy týrıstik kompanııalar baryn salyp kómektesip jatyr. Jaǵdaıymyz jaqsy. Qazaqstannan ushaqtyń kelý-kelmeýi keshki saǵat 7-ge deıin belgili bolatyn boldy. Eger reıs bolmasa, bizge jaýapty kompanııa ary qaraı qonaq úıde qaldyramyz dep otyr.
- Sizder jatqan qonaqúıde basqa qazaqstandyqtar bar ma?
- Iá, osynda 30-dan astam qazaqstandyq azamat bar. Bárimiz «MARTI MYRA-KEMER» degen qonaqúıde birge turyp jatyrmyz. Buıyrsa, elge birge qaıtpaqpyz.
- Suhbatyńyzǵa rahmet! Elge aman-saý jetýlerińizge tilektespiz.
