Antalııada qazaqstandyq týrısterge kómek kórsetý úshin jedel shtab quryldy - QR SІM
ASTANA. QazAqparat - Antalııada qazaqstandyq týrısterge kómek kórsetý úshin jedel shtab quryldy. Bul týraly búgin QR Syrtqy ister mınıstrliginiń resmı ókili Altaı Ábıbýllaev aıtty.
«Túrkııaǵa qatysty aıtar bolsam, men birqatar másele bar ekendigin bilemin. Belgili bolyp otyrǵandaı, biz barlyq qajetti kómekti kórsetýdemiz. Qazirgi ýaqytta bizdiń Elshilik pen Antalııadaǵy Qazaqstannyń konsýldyǵy jedel shtab, «jedel jeli» ashty. Ózderińizge belgili týrıstik fırmanyń týrıstik qyzmetinen zardap shekken bizdiń 46 azamatymyzdan 65 qońyraý kelip tústi. Olardyń barlyǵyna da qajetti kómek kórsetilýde. Týrıstik fırmalarmen, Túrkııa bıligimen birlesip, barynsha kómek kórsetý jáne atalǵan jaıttyń saldaryn barynsha tómendetý úshin barlyq sharalarǵa qolǵa alynýda», - dedi resmı ókil.
Aıta keteıik, 3 maýsym kúni TengriTravelsystem týrfırmasy óz saıtyna jumysyn toqtatatyny týraly jazǵan bolatyn. QR Investıtsııalar jáne damý mınıstrliginiń málimeti boıynsha, 600 ben 1000-ǵa jýyq aralyqtaǵy otandyq týrısterdi Túrkııada ornalasqan qonaqúılerinen shyǵaryp jiberýi múmkin. Osydan keıin, Azamattyq avıatsııa komıteti «Eır Astanamen» jáne basqa da áýe kompanııalarymen barlyq jumystardy atqarýǵa kirisip ketti. 19 maýsymǵa deıin «Eır Astana» kompanııasynyń uıymdastyrýymen Almaty-Antalııa jáne Astana-Antalııa reısteri toqtaýsyz jumys isteıtin bolady.
