Antalııa forýmynda ıadrolyq qarýdyń taralý qaýpi talqylandy
ASTANA. KAZINFORM – Antalııa dıplomatııalyq forýmy (ADF2026) aıasynda «ıAdrolyq máseleler nazarda: syndarly betburys kezeńi» atty paneldik pikirtalas ótti, dep habarlaıdy «Anadolý» agenttigi.
Pikirtalas geosaıasat jáne qorǵanys zertteýleri ortalyǵy dırektory Lınas Koıaldyń moderatorlyǵymen ótti. Oǵan ıAdrolyq synaqtarǵa jappaı tyıym salý týraly shart uıymynyń atqarýshy hatshysy Robert Floıd, BUU-nyń Venadaǵy turaqty ókili Mýstafa Kıbaroglý, sondaı-aq Eýropalyq odaqtyń ıadrolyq qarýdy taratpaý jáne qarýsyzdaný jónindegi arnaıy ókili ári Irannyń ıadrolyq baǵdarlamasy boıynsha arnaıy keńesshisi Stefan Klement qatysty.
Robert Floıd ıAdrolyq synaqtarǵa jappaı tyıym salý týraly sharttyń qabyldanǵanyna shamamen 30 jyl bolǵanyn atap ótip, osy ýaqyt ishinde ıadrolyq synaqtar sanynyń edáýir azaıýyn úlken jetistik dep baǵalady.
Onyń aıtýynsha, bul – memleketterdiń saıası mindettemesiniń nátıjesi. Atalǵan shart halyqaralyq baqylaý júıesin qurýǵa múmkindik berdi. Sondaı-aq ol ıadrolyq synaqtarǵa qarsy saıasatty odan ári jetildirýdiń mańyzyn atap ótti.
Mýstafa Kıbaroglý ıadrolyq materıaldardy zııandy maqsatta paıdalaný aýyr saldarǵa ákelýi múmkin ekenin aıtyp, qarýsyzdaný halyqaralyq senim men turaqtylyqtyń negizgi tirekteriniń biri ekenin jetkizdi.
– 1968 jyly tıisti shartqa qol qoıylyp, 1970 jyly kúshine endi. Sol kezde biz qarýsyzdaný bastalyp, jappaı qyryp-joıý qarýyn ázirleý toqtaıdy dep úmittendik, – dedi ol.
Stefan Klement kóptegen elder ıAdrolyq qarýdy taratpaý týraly sharttyń saqtalýyna múddeli ekenin atap ótti. Onyń aıtýynsha, qazirgi tańda halyqaralyq quqyqtyq tártip aıtarlyqtaı qaýipke tap bolyp otyr.
– ıAdrolyq soǵysqa esh jol berýge bolmaıdy. Óıtkeni mundaı soǵysta jeńimpaz bolmaıdy, – dedi ol.
Klement tek Reseı, Qytaı jáne AQSh emes, barlyq memleketter birlesip keń aýqymdy talqylaýlar júrgizýi qajet ekenin aıtty.
– ıAdrolyq qarý qoldanylǵan jaǵdaıda adamzattyń aman qalýy kópshilik oılaǵannan áldeqaıda kúrdeli, tipti múmkin emes, – dep túıindedi ol.
Buǵan deıin Qazaqstannyń Syrtqy ister mınıstri Taıaý Shyǵystaǵy jaǵdaı boıynsha kelissózder júrgizý alańy retinde Qazaqstannyń múmkindigi týraly pikir bildirgeni habarlanǵan edi.