Antalıadaǵy qonaq úılerdiń birinde ýlanǵan qazaqstandyqtardyń densaýlyǵyna eshqandaı qaýip tónip turǵan joq
ASTANA. 8 tamyz. QazAqparat - Antalıanyń «Grand Rıng» qonaq úıinde ýlanǵan birqatar sheteldik demalýshylardyń arasynda Qazaqstannyń 5 azamaty bar ekendigi belgili boldy. Bul týraly búgin Astanada QR SІM baspasóz hatshysy Nurjan Aıtmahanov málim etti.
«Qazaqstannyń Antalıadaǵy konsýldyǵynan kelip túsken aqparatqa sáıkes, otandastarymyz der kezinde jergilikti «Marına» emhanasynda tıisti em-dom alyp, qonaq úıge jetkizildi. Konsýldyq qyzmetkerler qazaqstandyqtarǵa barlyq tıisti kómekti kórsetti, emdeý mekemesiniń qyzmetkerlerimen kezdesip, azamattarymyzdyń densaýlyǵyna qazirgi ýaqytta eshqandaı qaýiptiń joq ekendigi anyqtaldy»,-dedi baspasóz hatshysy.
Azamattardyń ýlaný sebebin anyqtaý úshin, qonaq úı basshylary jáne medıtsınalyq personalmen kezdesý uıymdastyryldy. Bunymen qosa, Antalıa qalasynyń sanıtarlyq baqylaý salasyndaǵy quzyrly organdar tıisti jumystar atqarýda. Nátıjesi qosymsha habarlanatyn bolady.
«Qazirgi ýaqytta 3 azamatymyz basqa qonaq úıge aýystyryldy, 2 adamǵa aqshalary qaıtaryldy. Olardyń jaǵdaıy turaqty jáne ózderiniń densaýlyǵynan eshqandaı da bir shaǵym joq ekendigin habarlady. Jalpy osy qonaq úıde Qazaqstannyń 33 azamaty bar ekendigi anyqtaldy»,-dep túıdi N. Aıtmahanov.
