Antalıadaǵy álem chempıonatynda ózimniń jeńip shyǵatynyma senimdi boldym - Svetlana Podobedova
ALMATY. Qyrkúıektiń 30-y. QazAqparat /Erbol Turymbetov/ - Antalıadaǵy álem chempıonatynda ózimniń jeńip shyǵatynyma senimdi boldym.
Keshe aýyr atletıkadan álem chempıony atanǵan Svetlana Podobedova Almatyda ótken baspasóz máslıhatynda osylaı aıtty.
Túrkııada ótken álem chempıonatynda 63 keli jáne 75 keli salmaqtarda synǵa túsken qazaqstandyq aýyr atletter Maıa Maneza men Svetlana Podobedova álem rekordtaryn jańartýmen qatar, osymen ekinshi ret álem chempıondary atandy.
«Jarysta 2 reseılik sportshymen taıtalasý qıynǵa tústi. Alaıda, bul jarysta ózimniń jeńip shyǵatynyma senimdi boldym. Sporttyq ǵumyr munymen shektelip qalmaıdy. Endi aldaǵy Azııa oıyndaryna daıyndalamyn», deıdi S. Podobedova.
Esterińizge sala keteıik, qazaqstandyq sportshy osy álem chempıonatyndaǵy eń úzdik ziltemirshi atanǵan bolatyn. Qazaqstannyń aýyr atletıkadan áıelder quramasy byltyrǵy chempıonatta ekinshi orynǵa turaqtaǵan bolatyn. Bıyl da sol jetistigin qaıtalap, jalpy esepte Qytaıdan keıin ekinshi oryndy ıelendi.
