Ańshylyq týrızmin damytý úshin birqatar zańdarǵa ózgeris engizilýi múmkin
«Mádenıet jáne sport mınıstrligi Qazaqstan Respýblıkasynyń týrıstik salasyn damytýdyń 2025 jylǵa deıingi memlekettik baǵdarlamasyn ázirlep jatyr. Baǵdarlama maqsaty - týrıstik salany damytý, týrıstik ónimder men qyzmetterdiń sapasy men qoljetimdiligin arttyrý, jaıly týrıstik ahýal qurý, ishki jáne halyqaralyq naryqtarda elimizdiń týrıstik áleýetin ilgeri jyljytýdyń tıimdi júıesin qalyptastyrý, týrıstik salany damytýdy basqarý jáne oǵan monıtorıng júrgizý júıesin jetildirý. Talqylaý barysynda kásipkerler tarapynan ańshylyq týrızmin damytý úshin normatıvtik quqyqtyq bazany jetildirýge baılanysty usynystar engizildi», - dep jazdy áleýmettik jelidegi paraqshasynda Sáken Dildahmet.
Atap aıtqanda, usynystar mynadaı:
1) ań aýlaýdy uıymdastyrý boıynsha qyzmet kórsetý kezinde (ańshylyq týry kezeńinde) ańshylyq sharýashylyǵyn júrgizý sýbektileriniń ańshylarǵa atys qarýyn berý quqyǵy.
2) jeke tulǵalardyń ań aýlaý maqsatynda laqtyratyn qarýdy (ańshylyq sadaǵy) paıdalaný quqyǵy.
3) qarý ıeleriniń ıir oıyqty qarýdy oq-dárimen ózi jabdyqtaý quqyǵy
4) bir azamatqa tegis uńǵyly da, ıir oıyqty da qarýdyń 5 birlikke deıin ruqsat etilgen mólsherin kózdeıtin budan buryn qoldanylyp kelgen normaǵa qaıtyp oralý.
«Usynylyp otyrǵan sharalardy jan-jaqty zerdeleý maqsatynda QR AShM Orman sharýashylyǵy jáne janýarlar dúnıesi komıteti joǵaryda kórsetilgen usynystardy qarap, olar boıynsha óz ustanymdaryńyzdy fhcgovkz@gmail.com elektrondy poshtaǵa joldaýlaryńyzdy suraıdy» delingen habarlamada.