«Ánshýaq – 2024»: balalar ánderiniń respýblıkalyq chellendji bastaldy
ASTANA. KAZINFORM - Elimizde Ánshýaq-2024 balalar ánderiniń ekinshi respýblıkalyq chellendji bastaldy. Qazirgi tańda balalar oryndaǵan beınerolıkter 200 myńnan astam qaralym jınady.
«Ánshýaq» festıvali balalardyń talanttaryn ashýǵa múmkindik beredi jáne elimizdiń tarıhı-mádenı qundylyqtaryn nasıhattaıdy. Bul sharanyń «Birtutas tárbıe» baǵdarlamasy aıasynda óskeleń urpaqty tárbıeleýde mańyzdy ról atqaratynyn da aıta ketý kerek.
«Jańa oqý jyly bastalǵaly beri osy ıdeıamen shabyttanǵan 5 myńǵa jýyq mektep oqýshysy chellendjge qosyldy. Olar beınejazbalaryn Ánshýaq2024 heshtegimen TikTok-ta jarııalap, ózderi oryndaǵan balalar ánderin «Qazaq radıosyna» joldaıdy. 28 qyrkúıekten bastap Qazaq radıosynda «Ánshýaq radıo-festıvali» aıdary ashylady. Bul búkil Qazaqstannyń túkpir-túkpirindegi balalardy biriktiretin shyǵarmashylyq tolqyn. Qatysýshylar tek án oryndap qana qoımaı, sol ánderdiń óz ómirindegi mańyzy týraly jeke oılarymen de bólisedi», — deıdi Respýblıkalyq qosymsha bilim berý oqý-ádistemelik ortalyǵynyń dırektory Raısa Sher.
Chellendjge 6-18 jas aralyǵyndaǵy balalar men jasóspirimder qatysa alady. Balalar qazaq tilindegi ándi jandy daýysta oryndap, beınejazbasyn #Ánshýaq2024 heshtegimen TikTok-ta jarııalaýy kerek.
Esterińizge sala keteıik, «Ánshýaq» balalar ánderiniń chellendji alǵash ret 2024 jyldyń 1 aqpany men 1 maýsymy aralyǵynda ótip, jeti aı ishinde 12 myńnan astam jarııalanym jáne 12 mıllıonnan astam qaralym jınaǵan bolatyn. Qorytyndysy elimizdiń ár óńirinde «Open Air» formatynda ótkizilip, onda eń tanymal balalar ánderi shyrqaldy.
