Ánshiniń jýrnalıstik jumysty atqarǵanyn qalamaımyn - Roza Rymbaeva

Tuńǵysh kásibı mýzykalyq telearnanyń jumysy men baǵdarlamalyq formaty jóninde telearna prodıýsserleri aıtyp berdi.

Olardyń aıtýynsha, jańa arna tek otandyq mýzykany, otandyq oryndaýshylar men sazgerlerdiń jumysyn nasıhattaıtyn bolady.

«Arnada tek shoý-bıznes emes, elimizdiń mádenı ómirinde qandaı jańalyqtar bolyp jatqanyn, Qazaqstandaǵy ónerdiń qalaı damyp jatqanyn kórsetemiz. Erteń jańalyqtar efırge shyǵady. Ázirge júrgizýshilersiz kadr syrtyndaǵy mátinmen shyǵady. Bul tyńdarmandarymyzdyń 50 paıyzyn joǵaltpaıyq degen pikirden shyqty. Júrgizýshiler bireýge unasa, bireýge unamaıdy», - dedi arnanyń bas prodıýsseri Tımýr Balymbetov.

Qazaqstan ánshileriniń búginde ámbebap mamanǵa aınalǵany aıan. Qazir eki ánshiniń biri telejúrgizýshi, shoýmen. Televızııada beleń alǵan osy qubylys týraly sóz arasynda halyq ártisi Roza Rymbaevamen tildesýdiń reti keldi.

- Roza Qýanyshqyzy, qazirgi tańda ánshilerdiń ánshilikti qoıyp, jýrnalıstıkaǵa bet burǵanyna qalaı qaraısyz?

- Ánshiler tek kontsertterde júrgizýshi bolyp jumys jasaı alady. Óıtkeni, óziniń mamandyǵyna qatysy bar. Al, jalpy jýrnalıstik jumysty ánshilerdiń atqarǵanyna durys qaramaımyn. Múmkin bul problema durys jýrnalısterdiń joqtyǵynan bolar. Men áli kúnge mýzykalyq taqyrypty kásibı turǵyda talqylaı alatyn jýrnalısterdi kezdestirgen joqpyn. Olardyń kóbiniń qoıatyn suraqtary turmystyq deńgeıde. Olardy meniń qandaı kıim kıip, qandaı tamaq ishetinim, qandaı kólik minetinim ǵana alańdatady. Naǵyz mýzyka tilinde sóılesetin jýrnalıst joq.

- BAQ betterinde «juldyzdardyń» jeke ómiri eń oqylymdy taqyrypqa aınaldy. Ánshiler ıdolǵa aınalyp barady. Qaı arnany qossańyz da, shoý-bıznes ókilderi. Sebebi nede dep oılaısyz?

- Durys aıtasyz, ondaı jeńil nasıhat kóp. Qazir báriniń suraqtarynyń bári sol bolyp jatyr. Qazaqstanda estrada juldyzdarynyń ómirinen basqa jazatyn taqyryp quryp qap pa degen oıda qalasyń. Bylaısha aıtqanda, elimizde halyqty alańdatatyn basqa problema joq sııaqty. Maǵan bul jaǵdaı halyqty únemi kámpıt, tort berip aldaý sııaqty kórinedi. Men mundaı taqyrypta suraq qoıatyn jýrnalısterden qashamyn. Olarmen sóıleskim kelmeıdi. Bir jaǵynan ol telearnalardyń basshylaryna, ustanǵan saıasatyna baılanysty. Bárin jasaıtyn sol BAQ ókilderi. Halyqqa jetkizetin de solar.

- Endi olar da aýdıtorııanyń suranysyna qaraı jumys jasaıdy ǵoı. Gakku TV da sol arnalardyń birine arnalmaı ma?

- Joq. Biz aýdıtorııanyń suranysyna jumys istemeýimiz kerek. Kerisinshe, halyqtyń mádenı deńgeıin, mádenı saýatyn kóterý úshin jumys jasaýymyz kerek. Jańa ashylyp jatqan kanal tek qana mýzykalyq salany nasıhattaıdy. Otandyq oryndaýshylar, sazgerler, ulttyq mýzyka tarıhy týraly aqparat beriledi. Buryn qazaq oryndaýshylaryn tún ortasynda ǵana tyńdaýǵa bolatyn. Endi osy arna arqyly tipti shalǵaıda jatqan kórermender búkil Qazaqstan estradasynyń talantyn tamashalap, tyńdaıtyn bolady. Arnany ashýdaǵy basty maqsat - qazaq kórermeniniń mýzykalyq deńgeıin kóterý.

- Ózińiz osyndaı jeńil-jelpi shoýlarǵa barýdan bas tartasyz ba?

- Óte sırek baramyn. Ótirik, jeńil-jelpi jarnamany jek kóremin. Qyrkúıektiń 16-nda «Aıtýǵa ońaı» baǵdarlamasyna baramyn. Óıtkeni, baǵdarlama dúnıeden erte ozǵan belgili sazger Talǵat Sarybaevtyń shyǵarmashylyǵyna arnalmaq. Al men onyń jalǵyz oryndaýshysymyn.

- Suhbatyńyzǵa rahmet!