Ańshylyqtaǵy qaıǵyly oqıǵa: Aqmola oblysynda zeınetker oqqa ushty
ASTANA. KAZINFORM — Aqmola oblysynda ań aýlap júrgen er adam oqys jaǵdaıda mert boldy. Oq atylǵan qarýdyń ıesi — Kókshetaý turǵyny ustaldy, dep habarlaıdy Kazinform tilshisi.
Aqmola oblysy polıtsııa departamentiniń baspasóz qyzmetiniń málimetinshe, oqıǵaǵa qatysty qylmystyq is qozǵalǵan. Qazirgi ýaqytta sotqa deıingi tergeý amaldary júrgizilip jatyr.
— Qarý ıesi qamaýǵa alynyp, ýaqytsha ustaý ızolıatoryna jetkizildi. Aldyn ala anyqtalǵandaı, oqıǵa 6 qyrkúıek kúni Zerendi aýdanyndaǵy ańshylyq maýsymy kezinde bolǵan. Kókshetaý turǵynyna tıesili myltyqtan abaısyzda oq atylyp, qaıǵyly jaǵdaıǵa ákep soqqan, — dep habarlady vedomstvo ókilderi.
64 jastaǵy er adamǵa oq tıip, alǵan jaraqatynan oqıǵa ornynda kóz jumdy.
Polıtsııanyń málimetinshe, oqıǵanyń mán-jaıy anyqtalyp jatyr.
Eske sala keteıik, buǵan deıin Jambyl oblysynda úılený toıynan keıin atys shyǵarǵan bes adam 17 jylǵa bas bostandyǵynan aıyrylǵany habarlanǵan edi.
