Ańshylyq baılardyń ermegi, sondyqtan ań atý baǵasyn kóterý qajet – Májilis depýtaty

ASTANA. KAZINFORM — Ańshylyq arzan oıyn-saýyq emes, jaýapty tańdaý bolýy tıis. Bul týraly Májilistiń jalpy otyrysynda depýtat Elnur Beısenbaev aıtty.

— Janýarlar álemin paıdalanýǵa arnalǵan tólemderdiń mólsherin myń ese kóterý qajet dep sanaımyn. Qarapaıym mysal — qoıan aýlaý. Ańshylyqtyń qazirgi quny ne bári 117 teńge. Dúkendegi bir bótelke sýdan da arzan. Al bul rette oq 500 teńge turady. Mundaı jaǵdaı halyqtyń tabıǵatqa mensinbeı qaraýyn qalyptastyrady. Sonymen qatar bizge taıaý elderden sheteldik týrıster kelip, zańdy túrde tyıym salynbaǵan janýarlar álemin tıyn-tebenge atady, — dedi depýtaty jańa Salyq kodeksin talqylaý barysynda.

Osy oraıda ol jaǵdaıdy ózgertetin ýaqyt jetkendigin basa aıtty.

— Ańshylyq arzan oıyn-saýyq emes, jaýapty tańdaý bolýy tıis. Ańshylyq — bul baılardyń ermegi. Sondyqtan Úkimetke barlyq baǵany qaıta qarap, bıýdjetke túsimdi arttyrýdy ótinemin. Atalǵan klasterdi elıtaly qyzmet elementterimen halyqaralyq deńgeıge deıin damytýǵa bolady. Mysaly, Afrıkada ańǵa shyǵý eldiń jalpy ishki óniminiń aıtarlyqtaı bóligin toltyratyn óte qymbat týrızm. Máselen, Afrıka arystan atý 60 myń dollar turady, — dedi Elnur Beısenbaev.

Aıta keteıik, búgin Premer-mınıstrdiń orynbasary Májilistiń jalpy otyrysynda Salyq kodeksiniń jobasyndaǵy sońǵy ózgeristerdi atady.