Ańshylyq alqaptar el aýmaǵynyń 63%-yn qamtıdy

ASTANA. KAZINFORM — Orman sharýashylyǵy jáne janýarlar dúnıesi komıtetiniń tóraǵasy Danııar Turǵambaev áriptesterin kásibı mereke — Ańshylyq sharýashylyǵy kúnimen quttyqtap, salanyń negizgi kórsetkishterin jarııalady.

Komıtet málimetinshe, Qazaqstan aýmaǵyndaǵy ańshylyq alqaptar 170 mln 161 myń gektardy quraıdy, bul el aýmaǵynyń 63%-yna teń. Qorǵaý jáne turaqty ańshylyq sharýashylyǵyn júrgizý úshin respýblıkada 870 ańshylyq sharýashylyǵy jáne janýarlar dúnıesin qorǵaýǵa arnalǵan 18 arnaıy uıym jumys isteıdi.

Salada shamamen 5 myń adam eńbek etedi.

«Inspektorlar men ańshylyq sharýashylyqtarynyń qyzmetkerleri tabıǵatty qorǵaýnyń memlekettik júıesinde mańyzdy ról atqarady. Olar ekologııalyq jáne sanıtarlyq qaýipsizdikti qamtamasyz etip, tabıǵatty qorǵaý zańnamasynyń buzylýyn boldyrmaýǵa kúsh salady», — dedi Danııar Turǵambaev.

Onyń aıtýynsha, sala qyzmetkerlerine bıologııalyq resýrstardy qorǵaý, brakonerlikpen kúresý jáne ańshylyq sharýashylyǵyn turaqty damytý boıynsha mańyzdy mindet júktelgen.

«Bul — tek joǵary kásibı daıyndyqty ǵana emes, óz isine adaldyq pen tabıǵatqa degen shynaıy súıispenshilikti talap etetin jaýapty qyzmet», — dep atap ótti Komıtet tóraǵasy.

Turǵambaev salanyń qaýipsizdigi men tabıǵı tepe-teńdikti saqtaýǵa qosqan úlesi úshin mamandarǵa alǵys aıtyp, barsha qyzmetkerlerge densaýlyq, amandyq jáne tabys tiledi.

Aıta keteıik, buǵan deıin kúzgi-qysqy ańshylyq maýsymynda neni este ustaý qajet ekenin jarııaladyq.