Ánshilerdiń teleekranda baǵdarlama júrgizýine kim sebepker
ASTANA. QazAqparat - Astana Media Week atty birinshi medıa-aptalyqtyń MediaTalks sharasynda «A+1» kompanııasynyń bas dırektory Aınur Kópbasarova ánshilerdiń teleekranda baǵdarlama júrgizýine jol bergenderdiń biri bolǵanyn moıyndady, dep habarlaıdy QazAqparat.
Aıta keterligi, sharaǵa qatysýshylardyń biri Aınur Kópbasarovadan qazirgi ýaqytta telearnadaǵy baǵdarlama júrgizýshileriniń ornyn óner adamdarynyń almastyryp jatqandyǵyna qatysty pikirin suraǵan edi.
«Shynymdy aıtsam sol ánshilerdiń, óner adamdarynyń baǵdarlama júrgizýine sebepshi bolǵan, soǵan jol bergen adamdardyń birimin. Óıtkeni, 2011 jyly «Tań qalmańyz» degen baǵdarlamamyz bolǵan. Al sol kezderi qazaqsha baǵdarlamaǵa aqsha tabý óte qıyn edi. Soǵan qaramastan biz «Tań qalmańyzǵa» demeýshi taýyp, shyn máninde zamanǵa saı, reıtıngi joǵary baǵdarlama jasadyq. Al sol reıtıngti kóterý úshin eń birinshi bolyp ánshilerdi, akterlerdi júrgizýshilikke shaqyrǵan edik», - dedi ol.
Onyń paıymynsha, eger de ánshiniń, óner adamynyń, akterdiń aıtar oıy, kórseter baǵdary bolsa, sol baǵdarlamada izi anyq qalatyn bolsa, onda olarǵa júrgizýge múmkindik bergen jón.
«Biraq, keıingi kezde bizdiń kóptegen baǵdarlamalarymyzdy júrgizýge jýrnalısterge qaraǵanda ánshi, akterler kóp shyǵýda. Ony durys emes dep aıta almaımyn. Sebebi izasharlarynyń biri boldyq. Durys dep te aıta almaımyn. Óıtkeni, keıingi kezde shynymen de ol dúnıe bar... Jalpy, bári jýrnalısterdiń qolynda. Olar keremet baǵdarlama jasap, kógildir ekran arqyly adamǵa oı salarlyq dúnıe jasar bolsa, oǵan eshkim de qoı dep jatqan joq», - dedi Aınur Kópjasarova.
Shara barysynda Serik Aqyshev, Láılá Sultanqyzy, Mıhaıl Dorofeev syndy elimizge esimi belgili jýrnalıster jetistikke jetý joldarymen bólisti.
Esterińizge sala ketsek, Astana Media Week atty medıa-aptalyq birinshi ret ótkizilýde. Aptalyqtyń basty maqsaty - medıa naryǵyna qatysýshylardyń basyn biriktirip, ortaq bir alańda jınaý, ózekti ortaq máselelerdi talqylap, olardy sheshý joldaryn usyný. Shara negizinen úsh kúnniń ishinde ótedi. Birinshi kún «Kontent-market» dep ataldy. Sharanyń ekinshi kúninde «Astana Digital Forum» forýmy ótedi. Onda elektrondy ınternet-basylymdardyń jaı-kúı talqyǵa túsip, qazirgi kúnniń ózekti tendentsııalary - elektrondy saýda, krıptovalıýtaǵa kóshý syndy máseleler kóteriledi. Al úshinshi kúni «Óńirlik BAQ» forýmy ótip, baspa, BAQ-tyń jaı-kúıi, ózekti máseleleri, olardy saqtap qalý, aımaqtyq deńgeıdegi máselelerdi kóterý, BAQ salasyndaǵy zańnamalar, ózgerister, jýrnalıstıka ádebi syndy máseleler qozǵalady. Sonymen qatar osy is-sharanyń aıasynda Qazaqstan baspasóz klýbynyń uıymdastyrýymen «PR kúni» uıymdastyrylady.
