Ańshylarǵa tek analyq kıikti atýǵa ruqsat berilýi múmkin – mınıstr

ASTANA. KAZINFORM — Ekologııa mınıstri Erlan Nysanbaev ańshylarǵa kıik aýlaýǵa ruqsat berý týraly tilshiler suraǵyna jaýap berdi jáne onyń nelikten qaýipti ekenin aıtty.

− Ony da qarastyryp jatyrmyz. Biraq bul jerde qaýip kóp. Bizdiń keń baıtaq dalamyz úlken, al ınspektorlar sany ár ańshynyń artynan erip júrýge múmkindik bermeıdi. Bul tájirıbe Sovet dáýirinde bolǵan. Bir jyldary ruqsat berilip, búkil dala múıizi kesilgen kıikterdiń týshasyna tolǵan. Sol sebepti bıyl tek analyǵyna (ruqsat – red.) beremiz be dep oılap otyrmyz. Biraq qazir onyń joly, ár qadamy qalaı bolady – sony ańshylar uıymymen ózimiz aqyldasyp jatyrmyz, − dedi Ekologııa mınıstri Erlan Nysanbaev Senatta ótken brıfıngte.

Buǵan deıin E.Nysanbaev kıik sanyn retteýge qatysty ǵalymdardyń bıologııalyq negizdemesi kelesi aptada daıyn bolatynyn aıtqan edi.

Osy bıologııalyq negizdemege sáıkes, kıiktiń belgili bir sanyn aýlaý máselesi kóteriledi.

Sonymen birge Aqmola oblysynyń sharýalary kıiktiń qaptaýyna baılanysty tótenshe jaǵdaı jarııalaýdy usyndy.