Ánshi Jubanysh Jeksenuly tyńdarmandaryn eki jańa án jınaǵymen qýantpaq
ASTANA. QazAqparat - 28-sáýir kúni Almatyda respýblıkalyq jáne halyqaralyq baıqaýlardyń júldegeri, mádenıet qaıratkeri Jubanysh Jeksenulynyń eki birdeı án jınaǵynyń tusaýkeseri ótedi.
Oǵan óner sheberiniń oryndaýyndaǵy kópshilik kóńilinen shyqqan tanymal ánder men dýetter toptastyrylǵan. Olardyń qatarynda ánshiniń repertýaryna sońǵy jyldary qosylǵan «Janym apa», «Bala kez», «Qalqa bala», «Paı-paı, jigitter», «Ómir joly», «Baqyt týraly án» syndy biregeı týyndylar bar.
Tusaýkeser rásimine tanymal sahna sańlaqtary men jas ánshiler jáne arnaıy shaqyrylǵan qonaqtar qatysady, dep jazady qazaq-alemi.kz. Áıgili óner ıesi Jubanysh Jeksenuly 1974 jyly 23 aqpanda Ońtústik Qazaqstan oblysy, Sozaq aýdany, Yntymaq aýylynda dúnıege kelgen. 1991 jyly Jetisaı qalasyndaǵy Ǵ.Muratbaev atyndaǵy pedagogıkalyq kolledjin bitirgen. 2001-2005 jyldar aralyǵynda oblystyq Shámshi Qaldaıaqov atyndaǵy fılarmonııanyń ánshisi bolǵan. 2006 jyly Almatyǵa qonys aýdaryp, «Gúlder» memlekettik ansamblinde jumys istedi. 2002 jyly «Qazaqstan Respýblıkasynyń Táýelsizdigine 10 jyl» merekelik medalimen jáne 2011 jyly Mádenıet mınıstrliginiń «Mádenıet qaıratkeri» tósbelgisimen marapattalǵan.
