Ánshi Súndet Baıǵojın jerlesterimen onlaın-kezdesý ótkizdi
QOSTANAI. QazAqparat – Qostanaı oblysynda «Sálem saǵan, týǵan el!» onlaın jobasy bastaldy, dep habarlaıdy QazAqparat.
Oblystyq mádenıet basqarmasynyń basshysy Erlan Qalmaqovtyń bastamasymen qolǵa alynǵan jobanyń maqsaty – ár salada tabysty eńbek etip júrgen Qostanaı azamattarymen áleýmettik jelide baılanys ortaný.
«Qostanaı oblysynda dúnıege kelip, esimi elge tanylǵan óner qaıratkerleri men zııaly qaýym ókilderimen bolatyn suhbattar serııasyna «Sálem, saǵan, týǵan el» degen ortaq ataý berdik. Keshki efırde shyǵatyn basqa da jobalardyń bolýyna baılanysty, ári karantınde otyrǵan kópshilikke kúndiz de tuşymdy dúnıeler usyný maqsatynda bastapqyda suhbattarymyzdy kúndizgi ýaqytqa josparlap otyrmyz. Aldaǵy ýaqytta akterler men ánshiler Qostanaı jurtymen jelide qaýyshyp, suraqtaryn qoıa alady», - dedi Erlan Qalmaqov agenttik tilshisine.
Onlaın-kezdesýdi mádenıet basqarmasynyń basshysy júrgizip otyrady. Jobanyń alǵashqy qonaǵy Qazaqstannyń eńbek sińirgen qaıratkeri, Memlekettik syılyqtyń ıegeri, «Qurmet» ordeniniń kavaleri Súndet Baıǵojın boldy. Opera ánshisi Instagram áleýmettik jelisi arqyly jerlesteriniń suraqtaryna jaýap berip otyrdy.
«Karantın eshkimge ońaı tıip jatqan joq. Ókinishke qaraı, tóteden kelgen indetten kóz jumǵandar bar. Kóńili túsken halyqqa qoldan kelgenshe rýhanı kómek berýge tyrysamyz. Óner adamdary retinde kóptiń kóńilin ónerimizben aýlaǵymyz keledi. Áleýmettik jelidegi osyndaı jobalarǵa qoldaý bildiremin. Osy rette men de shaqyrtý jibergen qostanaılyqtarǵa, jerlesterime alǵys aıtqym keledi», - deıdi Súndet Baıǵojın.
