Ánshi Roza Rymbaevaǵa qatysty beımálim sýretter men beınekadrlar kórsetilmek
ASTANA. QazAqparat - Búgin keshke «Qazaqstan» telearnasyndaǵy «Senbilik kezdesý» baǵdarlamasynda Roza Rymbaevanyń ómirindegi beımálim sátter kórsetilmek. Kórermen ánshiniń ómirindegi alǵashqy mahabbat men alǵashqy túńilý, sahnaǵa alǵashqy qadam, ónerdegi alǵash sátsizdik, juldyzdy sát, tanymaldylyq, qaıǵysy týraly bile alady, dep habarlady telearnanyń baspasóz qyzmetinen.
«Qazaqstan» telearnasynda aqpannyń sońynda jańa formattaǵy-«memýarlyq» janrdaǵy «Senbilik kezdesý» atty jańa baǵdarlama shyǵa bastady. Júrgizýshi Qurmanbek Jumaǵalı tanymal tulǵalardyń el bilmeıtin jeke ómiriniń syrlaryn ashýǵa talpynady.
Baǵdarlamanyń kezekti qonaǵy - Qazaqstannyń «altyn daýysy», qazaqstandyq estradanyń «prımadonnasy», Qazaqstannyń halyq ártisi, Qyrǵyzstan men Ózbekstannyń eńbek sińirgen ártisi - Roza Rymbaeva. Estradadaǵy alǵashqy joly, «Araı» ansamblinde ótkizgen jyldary, alǵashqy sheteldik konkýrstary men kontsertteri týraly halyqaralyq konkýrstarda KSRO-ny tanytqan alǵash qazaqstandyq ánshi Roza Qýanyshqyzynyń óz aýzynan estımiz. Bolgarııada sátti óner kórsetip, sondaı-aq «Jyl áni» festıvaliniń fınalyna shyqannan keıin RozaRymbaeva KSRO-nyń «Zvýkovaıa dorojka» hıt-sherýinde ánshilerdiń úzdik ondyǵyna enip, 3-oryndy ıelendi. Osydan keıin ol Alla Pýgacheva men Sofııa Rotarýdan keıingi KSRO-nyń «úshinshi daýysy» degen ataqqa ıe boldy. Osy senbi kúni «Qazaqstan» telearnasynyń kórermenderi Roza Rymbaevanyń ómirimen jete tanysady. Bul 40 jyldyq tarıhy bar shyǵarmashylyq estelikterden quralǵan kesh bolmaq. Qazaqstandyq estradanyń jaryq juldyzy, sondaı-aq, súıikti de qamqor ananyń ómirinen alynǵan áli kúnge deıin eshkim kórmegen sırek sýretter men beınekadrlar, jurt bile bilmeıtin estelikter, tabys ákelgen alǵashqy sahnalyq kóılek osy keshte qalyń kópshilikke kórsetiledi. Stýdııaǵa kútpegen qonaqtar, onyń ishinde qarapaıym almatylyq taksı júrgizýshisi de keledi. Alǵashqy mahabbat men alǵashqy túńilý, sahnaǵa alǵash shyǵý jáne ónerdegi alǵash sátsizdikter, mıllıondaǵan tabynýshylar men juldyzdy sát, tanymaldyq, qaıǵy, orny tolmas qazalar. Búgingi kúni nemen aınalysady, bolashaqta shyǵatyn áni qandaı, neni armandaıdy. «Qazaqkontsert» respýblıkalyq kontsert birlestiginiń ánshisi jáne T.Júrgenov atyndaǵy Qazaq óner akademııasynyń professory, ustaz osy suraqtardyń jaýabyn 4 sáýir kúni 21.00-de «Qazaqstan» telearnasynan beretin bolady.
