Ánshi Roza Baǵlanova turǵan úıge memorıaldyq taqta qoıyldy
MATY. 25 tamyz. QazAqparat /Ádilet Musahaev/ - Roza Baǵlanova ultymyzdyń maqtanyshy edi. Máskeýde jurtshylyq onyń kontsertine kirý bıletin alý úshin úlken kezekte turatyn. Bul jóninde búgin Almatyda KSRO men QazSSR-niń halyq ártisi, Halyq qaharmany R.Baǵlanovanyń turǵan úıine memorıaldy taqtanyń qoıylý rásimi kezinde Qazaqstannyń halyq ártisi Sara Tynyshtyǵulova aıtty.
Birtýar ánshiniń turǵan úıine ashylǵan memorıaldy taqtanyń ashylýyna onyń týǵan-týystary, ónerine tabynýshylar men dostary kelip, óner ıesin eske aldy.
1922 jyly Qyzylorda oblysynda týǵan ánshi 1941 jyly Qyzylorda pedagogıkalyq ınstıtýtyn bitiredi. Onyń shyǵarmashylyq joly Uly Otan soǵysy jyldary bastalǵan. 1945 jyly 9 mamyrda Berlındegi jeńis kontsertine qatysqan. 1947-1949 jj. Abaı atyndaǵy qazaqtyń memlekettik akademııalyq opera jáne balet teatrynda isteıdi. 1949 jyly Býharestte ótken búkil dúnıejúzilik jastar men stýdentterdiń 2-festıvaliniń laýreaty atandy. 1949-1960 jj. Jambyl atyndaǵy Respýblıkalyq fılarmonııada jumys isteıdi. 1960 jyldan Qazaqkontsert solısi. Roza Baǵlanova sırek talantty ánshi, álem halyqtary ánderin sheber oryndaýshy. Ol búkil Qazaqstanda, KSRO-nyń burynǵy respýblıkalarynda, shetelderde bolyp, Otan, mahabbat pen dostyq, adam men tabıǵat týraly ánderdi shyrqady. Gastroldik saparǵa shyǵarda R. Baǵlanova mindetti túrde sol baratyn eliniń tilindegi ándi úırenedi. Biraq, qazaqtyń halyq ánderin onyń oryndaýynda tyńdaý lázzatyna eshteńe teń kelmeıdi.
