Ánshi Móldir Áýelbekova ózin prodıýser retinde synap kórmek
ASTANA. QazAqparat - Belgili ánshi, aktrısa jáne telejúrgizýshi Móldir Áýelbekova ánshi Indıra Elemestiń prodıýseri atandy. Bul týraly ol «Qazaqstan» arnasyndaǵy tańǵy «Tańsholpan» baǵdarlamasynyń tikeleı efırinde habarlady.
«Bul - ánshi Nurlan Espanovtyń ıdeıasy. Ol úlken medıa-ortalyq ashýda. Maqsaty - mádenıet salasynda ózge eldermen yntymaqtastyq ornatý. Ol Indıramen jumys isteýdi usyndy. Onyń bolashaǵy bar ekenine senip, prodıýserlik qyzmetti bastaýǵa bel býdym. Árıne, kóp oılandym, ol qyzdy da biraz synadym. Ol óz karerasyn endi ǵana bastap keledi, alaıda birqatar kontsertterge qatysyp úlgerdi. Ánderiniń birine klıp te túsirgen», - dedi M.Áýelbekova.
Indıra Elemes, óz kezeginde, bala kezinen úlken sahnadan óner kórsetýdi armandaıtynyn aıtty. «OQO Arys qalasynda týǵanmyn. Qazir Almatyda turamyn. Balalyq shaǵymda anama aıtpaı mýzykalyq mektepke oqýǵa tústim. Ol qarsy bolsa da, men án aıtýdy toqtatpaı, ónerime, óz-ózime senimdi boldym. Móldir bul salany jaqsy biledi. Sondyqtan birlesken jumys óz nátıjesin beredi dep oılaımyn», - dedi I.Elemes.
M. Áýelbekovanyń sózine qaraǵanda, aqpan aıynda shetelde alǵashqy birlesken klıp túsirilmek.
Móldir óziniń ánshi retindegi qyzmetin de toqtatpaıtynyn aıtty. Ata-anasynyń Taraz qalasynan Almatyǵa kóshýlerine baılanysty shyǵarmashylyq qyzmetinde sál kidiris jasaǵanyn aıtty.
