Ánshi Marat Omarov toı ótkizgen shymkenttik meıramhanaǵa qatysty tekserý bastaldy

ShYMKENT. QazAqparat - Ánshi Marat Omarov toı ótkizgen shymkenttik meıramhanaǵa qatysty tekserý sharalary bastaldy. Bul týraly qalalyq Polıtsııa departamentiniń baspasóz qyzmeti málimet taratty, dep habarlaıdy QazAqparat tilshisi.

Polıtsııanyń málimetinshe, meıramhana qojaıynyna aıyppul salý máseleleri qaralýda.

«Atalǵan jaıt boıynsha 12.04.2021 jyly Shymkent qalasy Táýke han dańǵyly boıyndaǵy Ken baba saıabaǵynda ornalasqan «KARAVAN« kafesiniń ıesinen túsinikteme alynyp, Ál-Farabı aýdany boıynsha sanıtarlyq-epıdemıologııalyq baqylaý basqarmasyna is-qujattar joldandy» delingen habarlamada.

Aıta keteıik, buǵan deıin áleýmettik jelilerde ánshi Marat Omarovtyń shymkenttik dámhanalardyń birinde otbasylyq toı ótkizgeni týraly aqparat taraǵan bolatyn. Tanymal kompozıtordyń qyzy Zúlfııa Omarovanyń uzatylý toıynyń kórinisterin qonaqtary vıdeoǵa túsirip, jelige júktep jibergen bolatyn. Juldyzdy áýlettiń qýanyshynda Sabına Altynbekova men Qaırat Túntekov bolǵany aıtylýda.