Ánshi Gúlnur Orazymbetova shyǵarmashylyq kontsertinde ulymen qosylyp án shyrqady (FOTO)
Sahna shymyldyǵy R.Taımanovtyń «Qorqyt-qobyz» án-dastanymen ashyldy. Myńjyldyqtar toǵysynda Gúlnur Orazymbetova osy bir erekshe týyndyny oryndaýymen ánsúıer qaýymnyń ystyq yqylasyna bólengeni belgili. Ánshiniń jańa oryndaýyndaǵy bul án ónerpazdardyń ulttyq naqyshtaǵy bılegen bıimen jarasymdy úılesim taýyp jatty. Sahna tórindegi úlken ekranda kórsetilgen ánge laıyqtalyp túsirilgen beınesıýjetter de shyǵarmashylyq keshtiń sánin arttyra tústi.
Qorqyt babamyzdyń ulylyǵy, qazaq dalasynyń keńdigi men qobyzdyń qudiretti úni osy bir án arqyly júrekterine jetken kórermender ánshige shynaıy qoshemet kórsetti. Odan keıin ánshi «Dombyra úni» ánin shyrqady.
Kelesi kezekte sahna tórine Súıinbaı Aronuly atyndaǵy Almaty oblystyq fılarmonııasynyń «Adyrna» ansambli shaqyryldy. Bul óner ujymy kórermenderge Marat Berdiqulovtyń «Aq saýyt» kúıin tartý etti. Gúlnur Orazymbetova kezinde osy ansambldiń súıemeldeýimen halqymyzdyń súıikti ánshisi Mádına Eralıevanyń kontsertteri jıi ótetinin aıta kelip, Beksultan Baıkenjeevtiń «Aq baıan» ánin oryndap berdi. Sondaı-aq Gúlnur ansambldiń súıemeldeýimen Jetisý óńiriniń «Aı-sáýlem-aı», Nurǵısa Tilendıevtiń «Qyz Jibek» fılmine jazǵan «Shirkin-aı» ánderin áýelete shyrqap, keń zalǵa jınalǵan kórermenderdiń qoshemetine bólendi.
Endi bir sát ánshi qolyna dombyra alyp, Maılyqojanyń ana týraly termesin óner súıer qaýymnyń nazaryna usyndy.
Bul keshte Gúlnur ónerde birge júrgen ánshi dostarymen qosylyp án shyrqady. Aıtalyq, «Azııa» tobymen, Álisher Kárimovpen, Búrkitpen, jas ánshi Serik Ibragımovpen birlesip oryndalǵan ánder kórermenderdiń kóńilinen shyǵyp, qoshemetine bólendi. Sol sııaqty uly Syrymmen birge «Ana men bala ánin» oryndap berdi.
Tanymal ázilkesh Qanat Ábjapparov óz ázilderin aıtyp, kórermenderdiń kóńilin bir serpiltip tastady.
Qazaq eliniń tarıhynan syr shertýden bastalǵan kontsert ulttyq án, kúı jáne termelermen jalǵasa kelip, qazirgi zamanǵy ánderge ulasty. Táýelsiz memleketimizdiń jetistikteri men Elordanyń sáni men sáýleti án bolyp shyrqaldy. Kontsert sahnalyq bezendirilýimen, ózara úndestik tapqan beınekórinistermen erekshelendi.
«Bıyl elimiz Qazaq handyǵynyń 550 jyldyǵyn atap ótýde. Osy tusta ulttyq salt-dástúrimizdi, rýhanı baılyǵymyzdy ánmen dáriptep júrgen bizder únsiz qalsaq, durys bolmas edi. Búgingi kontsert Qazaq handyǵynyń 550 jyldyǵyna arnalyp otyr jáne óner jolynda kele jatqanyma 15 jyl tolýyna oraı esep bergenim retinde qabyl alyńyzdar»,- dedi Gúlnur Orazymbetova.
Osy keshti belgili telejúrgizýshiler Láıla Sultanqyzy men Lambrıan Topýzıdıs júrgizip, óner súıer qaýymǵa Gúlnurdyń shyǵarmashylyq jetistikterin áserli jetkize bildi.
Aıta keter bolsaq, Gúlnur Orazymbetova 2000 jyly «Jas qanat» ánshiler baıqaýynyń 1-shi júldesin jeńip aldy, sol jyly «Azııa daýysy» halyqaralyq baıqaýyndaǵy «Qazaqstannyń jańa ánderi» baıqaýynyń úshinshi júldesin ıelendi, al 2001 jyly Bolgarııada ótken 10-shy halyqaralyq mýzykalyq festıvaliniń de júldegeri atandy.
