Ánshi Darkhan Juzz-diń aıaqtalmaǵan albomy jaryqqa shyǵady

ASTANA. QazAqparat – Taılandta jol-kólik apatynan qaıtys bolǵan otandyq ánshi Darhan Júnisbekovtiń aıaqtalmaǵan albomy jaryqqa shyǵady. Bul týraly QazAqparat tilshisi «õzen» mýzykalyq leıbliniń áleýmettik jelidegi paraqshasyna silteme jasap habarlaıdy.

«Darkhan Juzz-diń aıaqtalmaǵan albomy qaldy. Biz ony mindetti túrde aıaqtap, shyǵaramyz. Onyń barlyq ánderin paıdalaný quqyǵy uly Adı men qyzy Aıdanaǵa beriledi. Strımıngiden túsetin 100% qarajat onyń otbasyna aýdarylady. Darhannyń murasyn saqtap qalý úshin kóp jumys atqarylady. Onyń mýzykasy máńgi saqtalsyn», - delingen «õzen» leıbliniń Іnstagram-daǵy resmı paraqshasynda jarııalanǵan habarlamada.

Sonymen birge, jelide qazaqstandyq jas ánshiler Darhan Júnisbekovtiń artynda qalǵan eki balasy men otbasyna qoldaý kórsetý úshin kómek jınaý bastalǵanyn habarlap jatyr.

Eske salaıyq, 24 aqpanda Phýket aralynda Darkhan Juzz sahnalyq atymen belgili otandyq ánshi Darhan Júnisbekov jol-kólik apatynan qaıtys boldy. Syrtqy ister mınıstrligi máıitti Qazaqstanǵa jetkizý úshin qajetti qujattardy resimdeý boıynsha jumys júrgizilip jatqanyn málim etti.

Keshe keshke óner ıesiniń jankúıerleri Almaty qalasynda onyń rýhyna taǵzym etip, mýzykanttyń ánderin oryndaýmen eske aldy.