Ánshi Aıqyn Soso Pavlıashvılımen birgip beınebaıan túsirýde
ASTANA. QazAqparat - Reseılik ánshi Soso Pavlıashvılımen dýet oryndaǵan Aıqyn oǵan beınebaıan túsirýde. Ánniń sózin qazaqshaǵa aýdarǵan - Arman Dúısenov, onyń óńdeýin Rınat Ǵaısın jasaǵan.
«Án názik jandylar jaıynda bolmaq. Bul ánimizdi barsha áıelderge arnaımyz», - dedi Soso Pavlıashvılı.
Áıgili óner juldyzy Sosomen án oryndaý Aıqyn úshin úlken qurmet. Sondaı-aq ol onymen kezdeserde qobaljyǵanyn da jasyryp qalmady.
«Qalaı tanysamyn, ne dep aıtamyn, qalaı bolady degen qobaljý boldy. Biraq Sosonyń qasyna kelgennen keıin onyń ózine baýraıtyn qasıeti bar óte qarapaıym, adamı tárbıesi óte joǵary adam ekenin bildim. Bir aıtqany bar Sosonyń: «Sen sahnaǵa shyqqanda ártis bol, sahnadan tómen qaraı túskende adam bol degen», - deıdi Aıqyn.
Túsirilip jatqan beınebaıan kelesi jylǵy kóktemge jaqyn jaryqqa shyǵady, dep habarlaıdy gakku.kz.
Sóz sońynda, alystan at arytyp kelgen áıgili ánshi elimizdiń Táýelsizdik merekesimen quttyqtaýdy da umytpady.
