«Ánshi ánin aıtsyn, jýrnalıst baǵdarlamasyn júrgizsin!» - M.Túsipbaeva
ASTANA. QazAqparat - Ánshi Merýert Túsipbaeva «Astana» arnasynyń «Syrlasý» baǵdarlamasynda ánshilerdiń telejúrgizýshilikpen aınalysatynyn qatań synady, dep habarlaıdy Baistars.kz.
«Etikshi - etik tiksin, jýrnalıst - baǵdarlama júrgizsin. Qazirde ánshiler baǵdarlama júrgizedi: ne dıktsııa joq, ne oı joq, ne ıntellekt joq. Túri ádemi ánshilerdi júrgizýshi qylyp qoıady, al olar bolsa ne aıtyp otyrǵanyn ózderi de bilmeıdi. Nege ol mundaı qyzmette otyrady? Óıtkeni ol tanymal, al jýrnalıst tanymal emes. Atam zamannan baǵdarlamany jýrnalıster júrgizetin, ózderi júrgizsin. Ánshi ánin aıtsyn, bıshi bıin bılesin, qarjyger aqsha sanasyn. Memleketimizdiń rýhanı aqsap jatatynynyń bir sebebi de osy», - dedi Merýert Túsipbaeva.
Sonymen qatar, ol ónerge syrttan keletin ónerpazdardy jaqtyrmaıtynyn bildirdi.
«Biz óner jolyna túsýden buryn bilim aldyq: kolledj, akademııa, aspırantýra. Ár satydan óttik. Al ónerde júrgen keı adamdar notany da bilmeıdi. Odan: «Tonıka, sýbdomınanta, domınanta degen ne?» - dep surashy - bilmeıdi.
Estradada ǵana emes, kınoda da syrttan kelgen adamdar kóp. Nege bizdiń qazaqtyń kınosyna kóp kórermen qyzyqpaıdy? Óıtkeni kınoǵa, serıalǵa syrttan adamdardy ákele salady. Bizde osy qazaqbaıshylyq jaılaǵan. Ónerde osy bolmasa eken deımin», - dedi Túsipbaeva.
Sońǵy kezderi akterlik qyrymen de tanylyp júrgen ártis Qazaqstanda kınoındýstrııa damysa, estradadan múlde ketkisi keletinin de jasyrmady.
