Ánshi Ámre Chehııadaǵy baıqaýdan Gran-Prı utyp aldy
QOSTANAI. QazAqparat - Ámre esimimen tanys jas ánshi Ernar Sadyrbaev Praga qalasynda ótken eki birdeı halyqaralyq án baıqaýynan Gran-Prı júldesin utyp aldy. Baıqaý aıaqtala salysymen Ámre «QazAqparat» HAA tilshisiniń suraqtaryna jaýap berdi.
- Jeńis qutty bolsyn! Qatelespesek, Chehııada eki birdeı jarysta ozyq shyqtyńyz. Qaı elderdiń ónerpazdarymen synǵa tústińiz?
- Rahmet! Aldymen, Reseı Federatsııasynyń Chehııadaǵy elshiliginiń uıymdastyrýymen ótken sharaǵa qatystym. Sharty boıynsha tek qana orys tilindegi óleńderdi aıtý kerek boldy. Birinshi týrda - «Angel», ekinshisinde «Na kontınenty» degen ánderdi shyrqadym. Sóıtip, qazylar alqasynyń joǵary upaıyn ıelendim. Ekinshi halyqaralyq vokal baıqaýy «Diamond voice festival-2017» dep atalady. Rasyn aıt kerek, bul synnyń bási joǵary boldy. Sebebi, Ispanııa, Bolgarııa, Grýzııa, Angola, Reseı, Chehııa, Kolýmbııa syndy elderdiń «men» degen ónerpazdary keldi. Shynymdy aıtsam, Aleksandr Morozov, Brýno Elýshıch, Kamıla Hıýbsh, Hýan Lopes sııaqty esimderi tanylyp qalǵan ánshilerdiń arasynan bas júlde maǵan buıyrady dep oılamadym. Qýanyshymda shek joq!
- «Diamond voice festival-2017» qazylaryn qandaı ánderińizben tańǵaldyrdyńyz?
- Bul baıqaý da eki kezeńnen turdy. Áýeli, Motsarttyń áıgili Je dour ser der roses mıýzıklin oryndadym. Sheshýshi kezeńde ózimizdiń «Qusnı-Qorlandy» alyp shyqtym. Osy óleńdi Germanııada bolǵan «BerlinePerle-2014» saıysynda da oryndap, úzdik úshtikten kóringenmin.
- «Qusnı-Qorlan» ánin tańdaýyńyzǵa ne sebep boldy?
- Menińshe, Arqa mektebine tán sal-serilik dástúrdiń sarqyty Estaı Berkimbaıulynyń esimin bilmeıtin qazaq kemde-kem shyǵar. Onyń mahabbat ánurany sanalatyn ataqty «Qusnı-Qorlany» ózimniń súıip shyrqaıtyn ánime aınaldy. Jalpy, osy ánniń tarıhy ózime unaıdy. Suraǵan kisilerge Saparǵalı Begalınniń 1939 jyly Estaıdyń óz aýzynan jazyp alǵan sózin aıtyp beremin.
- Dástúrli suraq: óner jolyna qalaı keldińiz?
- Ánshilerdiń kóbi mektep qabyrǵasynan-aq óz jolyn tańdap qoıatyn bolar. Meniki de osylaı bastaldy. Qostanaı qalasynda oqydymy. Án-saz pániniń muǵalimi ánge degen jaqyndyǵymdy baıqap, qalalyq jarystarǵa qatystyryp júrdi. Keıin 7 jyl mýzyka mektebin aıaqtadym. QR eńbek sińirgen ártisi Aleksandr Kalýgınniń tálimin aldym. Árıne, ánshilikke jol bastaýshy bolǵan T.Júrgenov atyndaǵy Óner akademııasy ekeni daýsyz.
- Basqa qandaı halyqaralyq baıqaýlarǵa qatystyńyz?
- Alys-jaqyn shet elderdiń daryndylaryn jıǵan «Altyn mıkrofon», «Boztorǵaı» baıqaýlarynyń júldesine ıe boldym. Odan bólek, «Delfı oıyndary» konýrsynyń laýreaty atandym. Reseıdegi án baıqaýlarynda birneshe ret baq synadym. Nátıjeleri de jaman emes. Mılanda ótken «EKSPO-2015» halyqaralyq kórmesinde án aıtý qurmetin ıelendim.
- Bir suhbatyńyzda anańyzǵa arnap án jazǵyńyz keletinin aıtyp edińiz...
- «Arman degen kóp beles: birine shyqsań - biri bar». Qalaı bolǵanda da, balalyq boryshymnyń bir pushpaǵyn osylaı ótegim keldi. Oǵan da qol jetti. «Anashym» atty ánime beınebaıan da túsirildi.
- Endigi armanyńyz ne?
- Ánshiler únemi izdeniste júrýi tıis. Ánshilik sheberlikti shyńdaýdyń syrtynda, kez-kelgen aspaptyń tilin ıgerýdi maqsat tutamyn. Al azamat retindegi armanym - Qazaqstan baıraǵyn óz ónerimmen bıiktetý.
