Ánshi Álı Oqapov «Jyl stýdenti» atandy
ASTANA. 18 qarasha. QazAqparat - Búgin Astanada Qazaqstannyń "Jyl stýdenti - 2013" respýblıkalyq baıqaýynda tanymal ánshi, T. Júrgenov atyndaǵy Qazaq ulttyq óner akademııasynyń stýdenti Álı Oqapov gran-prı júldesine ıe boldy, dep habarlaıdy QazAqparat tilshisi.
Jalpy baıqaýǵa JOO stýdentteri men magıstranttarynan 154 ótinish kelip túsken. Sharada "Jyl stýdenti" ataǵynan bólek, "Belsendi stýdent" atalymynda M.Qozybaev atyndaǵy Soltústik Qazaqstan memlekettik ýnıversıtetiniń stýdenti Musa Tanaqulov bas júldeger boldy. "Jas ǵalym" atalymynda elordadaǵy L. Gýmılev atyndaǵy EUÝ stýdenti Talǵat Urtambaev, "Úzdik sportshy" baıqaýynda M. Ótemisov atyndaǵy Batys Qazaqstan memlekettik ýnıversıteti stýdenti Temirlan Qolbaı, "Úzdik mádenı qaıratker" ataǵynda T. Júrgenov atyndaǵy Qazaq ulttyq óner akademııasynyń stýdenti, "Jaýjúrek myń bala" otandyq fılminde bas róldi somdaǵan akter Asylhan Tólepov jeńimpaz atandy. Sonymen qatar "Úzdik stýdenttik áleýmettik joba" atalymynda Astanadaǵy S. Seıfýllın atyndaǵy Agrotehnıkalyq ýnıversıtetiniń stýdenti Aıgerim Kókeevanyń "Áleýmettik qorǵalǵan stýdent" jobasy birinshi orynǵa ıe boldy. "Úzdik stýdenttik bıznes joba" atalymy boıynsha Sh. Esenov atyndaǵy Kaspıı memlekettik tehnologııa jáne ınjınırıng ýnıversıtetiniń stýdenti Azamat Shadırov myqtylar sanatynan tabyldy. "Úzdik tilshi" atty taǵy bir atalymda Taraz memlekettik pedagogıkalyq ınstıtýtynyń oqýshysy Erǵalı Qapalov, "Úzdik erikti" nomınatsııasynda Sh.Ý álıhanov atyndaǵy Kókshetaý memlekettik ýnıversıtetiniń stýdenti Ásemgúl Qazezqyzy, "Úlgerimi úzdik stýdent" atalymynda M. Áýezov atyndaǵy Ońtústik Qazaqstan memlekettik ýnıversıtetiniń stýdenti Gúlnár Orazalına jeńimpaz ataǵyna laıyqty dep tanyldy.
"Jyl stýdenti-2013" respýblıkalyq baıqaýy "Qazaqstan stýdentter alıansy" qozǵalysynyń uıymdastyrýymen ótti.
