Ánshi Ádemige sheteldikter «quda túsýde»
ASTANA. QazAqparat - «Jańa tolqyn - 2015» baıqaýynyń júldegeri ánshi Ádemige horvatııalyq ánshi D.Kedze birlesip án jazýǵa usynys jasady. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte ánshiniń mýzykalyq prodıýsseri Rınat Ǵaısın málim etti.
«Iá, usynystar tústi. Meniń ózime de Sochıde bolǵanymda baıqaýdyń bas júldesin alǵan Horvatııa ánshisi Damır Kedze eýropalyq bir albomdy birlesip jazýǵa usynys jasady. Sonymen qatar ol Ádeminiń ónerine tánti bolyp, aǵylshyn tilinde birlesip án jazaıyq degen usynysyn bildirdi. Qazir bul máselelerdi oılastyryp jatyrmyz. Munan bólek, Máskeýge de jolymyz túsýi múmkin. Biraq, qazirgi eń basty maqsatymyz - óz elimizde Ádeminiń jeke albomyn shyǵarý", - dedi BAQ ókilderine R.Ǵaısın.
Aıta keteıik, Sochı qalasynda ótken Halyqaralyq «Jańa tolqyn - 2015» baıqaýyna qatysqan qazaqstandyq ánshi Ádemi ekinshi oryndy jeńip alǵan bolatyn.
