Ánshi Ademi: «Men Janel Sádýaqastyń ónerin asa joǵary baǵalaımyn»
ASTANA. QazAqparat - Astanalyq Janel Sádýaqas jaqynda «Balalar jańa tolqyny» baıqaýy ótken Artek lagerinen oraldy. Jas ánshi «qola» júldege qol jetkizip, baıqaý tarıhynda buryn-sońdy bolmaǵan eń kóp qoldaýshylar jınaǵany úshin syılyq aldy, dep jazady elorda ákimdiginiń baspasóz qyzmeti.
Janeldiń tálimgeri ánshi Ademi de byltyr «Jańa tolqyn» baıqaýynda ekinshi oryn alǵan bolatyn. Ol baıqaýdyń qalaı ótkeni týraly áńgimelep, jas oryndaýshynyń aldaǵy josparlarymen bólisti.
Baıqaýda 11 elden 15 jas daryn baǵyn synady. Birinshi kúni Janel «Qazaq eli osyndaı» ánin, al ekinshi kúni Krıstına Agıleranyń «Something's got a hold on me» ánin oryndady.
- Alǵashqy daıyndyqtan bastap Janeldiń janynda boldym, oǵan kásiptik qoldaý kórsettim. Repetıtsııalar Artektiń janyndaǵy Alýshte qalasynda ótti. Bári bir zalda daıyndaldy. Árıne, básekelestik boldy. Biraq uıymdastyrýshylardyń durys tártibi, durys erejeleri uıymshyldyqta mańyzdy ról atqardy. Balalar bir otbasydaı tatý boldy, jarys kúnderi bir-biri úshin shyn qýanyp jatty. Eresekter oryndaýshylarǵa olardan úlgi alý kerek, - deıdi ánshi Ademi.
Onyń aıtýynsha, Janel repertýar tańdaǵanda qınalǵan. Aldymen komıssııa eki ándi tańdady, biraq olar baıqaýdyń formatyna saı bolmaı shyqty. Sondyqtan az ýaqyttyń ishinde repertýardy tolyq ózgertip, ánderdi jańadan árleýge, baıqaýǵa qaıta daıyndalýǵa týra keldi. Jas oryndaýshynyń janynda anasy, tátesi, horeograf pen moraldyq jáne emotsıonaldy qoldaý kórsetken baýyry da bolǵan.
- Baıqaýǵa qatysýymyzdyń maqsaty - Janeldi oryndaýshy retinde odan ári damytý, jańa deńgeıge shyǵý, jetekshi prodıýserlerdiń qol astynda jumys isteý. Men Janeldiń ónerin asa joǵary baǵalaımyn, óıtkeni «Balalar Jańa tolqynyna» qatysýdyń ózi jeńis, al júldeli orynǵa ıe bolý - úlken jetistik. Bul shyǵarmashylyq jolda baǵyndyrǵan taǵy da bir beles, bul odan ári eńbektenip, vokaldyq sheberlikti shyńdaýǵa sep bolady, - deıdi Ademi.
Janel bes jasynan bastap túrli respýblıkalyq baıqaýlarǵa qatysyp, top jarýda. Janeldiń erekshe daýysyn baıqap, onyń shyǵarmashylyǵyn damytýǵa jan-jaqty qoldaý kórsetip kele jatqan ata-anasynyń arqasynda 11 jasar ánshi Qazaqstanda ǵana emes, halyqaralyq alańdarda da sátti óner kórsetip júr.
