Ánshi Erbolat Qudaıbergenov narkologııalyq mekemege ornalastyryldy

ALMATY. KAZINFORM — Almatyda ánshi Erbolat Qudaıbergenov narkologııalyq mekemege 15 táýlikke ornalastyryldy. Buǵan deıin áleýmettik jelilerde onyń Almatydaǵy narkologııalyq ortalyqtyń mańynda júrgeni túsirilgen vıdeo taraǵan edi. 

Almaty polıtsııa departamentiniń málimetinshe, kópqabatty turǵyn úılerdiń biriniń turǵyndarynan kórshisiniń agressıvti minez-qulyq tanytyp, qoǵamdyq tártipti buzyp júrgeni týraly habarlama túsken.

— Ýchaskelik polıtsııa ınspektory oqıǵa ornyna jedel túrde bardy. Aqparat rastaldy: azamattyń jaǵdaıy qalypty emes ekeni anyqtalyp, aınalasyndaǵylarǵa agressııa tanytyp, turǵyndardyń tynyshtyǵyna qaýip tóndirgen, — dep habarlady vedomstvonyń baspasóz qyzmeti.

Erbolat Qudaıbergenov medıtsınalyq tekserýden ótken. Ol dárigerlerdiń qorytyndysy boıynsha 15 táýlikke mamandandyrylǵan medıtsınalyq mekemege ornalastyryldy.

Sonymen qatar polıtsııa qyzmetkerleri ony Qazaqstan Respýblıkasynyń Ákimshilik quqyq buzýshylyq týraly kodeksiniń birneshe baby boıynsha ákimshilik jaýapkershilikke tartty. Atap aıtqanda, azamattardyń tynyshtyǵyn buzý, tirkeýsiz turý jáne qoǵamdyq oryndarda azamattarǵa tıisý faktileri boıynsha tıisti sharalar qabyldandy.

Polıtsııanyń málimetinshe, bul Qudaıbergenovtiń qoǵamdyq tártipti buzýǵa qatysty tirkelgen alǵashqy oqıǵasy emes. Ol buǵan deıin de osyndaı quqyq buzǵany úshin ákimshilik jaýapkershilikke tartylǵan.

Eske salaıyq, buǵan deıin Qarakesek laqap atymen tanymal ánshi sotqa májbúrlep jetkiziletinin jazǵan edik.